Nga Boldnews.al
Në verën e vitit 2021, OSBE-ODIHR-i publikoi një ndër raportet më kritike për ecurinë e zgjedhjeve në Shqipëri që prej vitit 1997.
Vëzhguesit ndërkombëtar konstatuan të paktën dy elementë thelbësorë, të cilët deformuan vullnetin e lirë të qytetarëve për të votuar-presionin e qeverisë mbi administratën dhe përdorimin gjerësisht të aseteve publike në favor të fushatës së Partisë Socialiste në pushtet.
Këto konstatime, të cilat duhet të kishin lëvizur nga themelet qeverinë e një vendi aspirant për të qenë pjesë e Bashkimit Europian, në realitet nuk patën asnjë ndikim mbi Ramën dhe oborrtarët e tij.
Drejtuesja e misionit të vëzhguesve ndërkombëtare, Audrey Glover, e cila do të kryesojë misionin e OSBE-ODIHR-it edhe për zgjedhjet lokale të 14 majit 2023, u pyet në një konferencë të zhvilluar paraditen e kësaj të Premte se çfarë ndodh nëse qeveria shqiptare nuk i merr në konsideratë gjetjet e mëparshme.
“Ne do të rekomandojmë sërish”, u përgjigj Glover. Natyrisht, një raport negativ ose me kritika për cilësinë e zgjedhjeve, nuk i shërben aspak shtetit shqiptar, por a është e mjaftueshme për të bindur Edi Ramën që të zhvillojë zgjedhje normale?
Nuk duket se kryeministri shqiptar dhe pasuesit e tij janë ndikuar nga raporti negativ i OSBE-ODIHR-it të vitit 2021. Përkundrazi.
Të gjithë të dhënat dëshmojnë se Edi Rama po vijon masivisht që të intimidojë hapur administratën publike, si edhe të përdorë më shumë se sa kurrë asetet publike në shërbim të propagandës qeveritare.
Nga Patronazhisti tek Aktivisti
Në fushatën zgjedhore të vitit 2021, në media u publikua një bazë të dhënash shumë e madhe me gjeneralitetet e mbi 900 mijë votuesve, përfshirë edhe prirjet e tyre politike.
Baza e të dhënave “Patronazhisti” përmblidhte në vetëvete edhe mekanizmat për të joshur votuesit, duke i përmbushur kërkesat e tyre për akte të ndryshme administrative, si legalizime, punësime e të tjera vendime publike.
Prokuroria e Posaçme nisi hetimin pas publikimit të këtyre të dhënave. Por, nuk mori nën hetim hartuesit e kësaj baze të dhënash tërësisht të paligjshme dhe që kishte shfrytëzuar informacionet e depozituara nga qytetarët në institucionet publike.
Hetimi i SPAK-ut u fokusua tek gazetarët që publikuan listën.
Pasi Rama e tregoi qartë se nga SPAK-u nuk i vinte asnjë e keqe, pavarësisht çdo lloj shkeljeje, krijoi një aplikacion teknologjik, i cili perfeksionoi “Patronazhimin” e administratës.
Ky aplikacion që instalohet në telefonat inteligjentë quhet “Aktivisti”. Në këtë platformë publikohen materiale propandistike qeveritare dhe administrata monitorohet për të parë interaktivitetin e tyre me këto mesazhe politike.
Më qartësisht, çdo punonjës i administratës publike do të vlerësohet në punën e tij në varësi të “pëlqimeve” (like) dhe “shpërndarjeve” (share) të propagandës së Edi Ramës dhe qeverisë së tij.
Kushdo nga administrata që guxon t’i bëjë rezistencë përdorimit të këtij aplikacioni, mund të përballet me presione për vendin e punës.
Përdorimi i aseteve publike
Në zgjedhjet e përgjithshme të vitit 2021, qeveria përdori masivisht asetet publike për të siguruar vota në favor të saj. Një prej mekanizmave më të përhapur gjerësisht ishin dhënia e fondeve të Rindërtimit, pas tërmetit që kishte ndodhur dy vite më parë, në nëntor 2019.
Për zgjedhjet lokale të vitit 2023, Rama ka nisur të aplikojë një tjetër strategji-ai ka premtuar rritje rrogash në masë për kategori të ndryshme të punësuarish.
Ndërkohë, qeveria e tij miratoi një “pilulë elektorale” për pensionistët, duke u shpërndarë 5 mijë lekë të reja, duke nisur nga 1 Prill 2023.
Pra, duket qartë që Rama jo vetëm nuk i ka marrë në konsideratë gjetjet negative të raportit të OSBE-ODIHR-i, por ai ka intensifikuar strategjinë e tij për të mbledhur sa më shumë vota, duke keqpërdorur asetet publike.
Ai tashmë e di që Audrey Glover, thjesht “do të rekomandojë sërish”.
Është e qartë se OSBE-ODIHR-i është një mision vëzhgues dhe nuk është vendimmarrës.
Ata që e lexojnë atë raport dhe që kanë mundësinë për të ndikuar mbi Edi Ramën, duket se deri tani kanë zgjedhur “stabilokracinë” e Shqipërisë, përballë demokracisë.
