Sekretari për ekonominë në Partinë e Lirisë, Petraq Milo tha në studion e emisionit “Log” në Panorama TV se në 8 vite qeveria nuk ka pasur vullnet politik për të rritur pagën minimale.
Sipas Milos, sot paga mesatare duhet të ishte 830 euro, ndërsa renditi edhe faktorët që e çuan kryeministrin Rama për të rritur pagën minimale.
Teksa solli disa shifra, Milo u shpreh se në 2006 totali i pagave ka qenë 22% e buxhetit të shtetit ndërsa në 2022 ka qenë 13%.
“Nëse në 2006 totali i pagave ka qenë 22% e buxhetit të shtetit në 2022 është 13%. Kemi pra një ulje gati gjysmë për gjysmë. Ku i çon? Theksi ka qenë rritja e shpenzimeve kapitale, operative dhe ato për interesa. Pra prioritet i qeverisë ka qenë rritja e shpenzimi i kapitaleve.
Nuk ka pasur vullnet politike. Sot rritja e pagave është e mirëseardhur. Por ka qenë edhe më parë mundësia për t’u rritur. Sot paga duhet të ishte 830 euro, paga mesatare. Pra jemi në këto kushte që qeveria nuk ka pasur vullnet politike. E dyta është mungesa e presionit të sindikatave.
A mund të thuhet se është presioni i opozitës që ka cuar ujë në këtë drejtim, apo Rama ka kuptuar se diçka duhet të japë?
Unë them që është presioni i opozitës një, por është edhe populizëm në prag të zgjedhjeve. Nuk po i hyj këtij diskutimi, por do të thoja që duhet vënë në dukje një gjë. Rritja e pagës është e mirëseardhur, por në 8 vjet kush e ka kompensuar atë ulje të fuqisë blerëse të individëve, ajo nuk rikthehet më”, u shpreh Milo.
