Megjithëse Shqipëria po përballet me shifra alarmante të shpopullimit, kryeministri Edi Rama nuk ndihet i shqetësuar pasi nga vendi ynë po largohen të rinjtë të cilët nuk shohin asnjë shpresë.
Duke hequr përgjegjësinë e tij për keqqeverisjen dhe korrupsionin galopand me tenderrat abuzivë të denoncuar çdo ditë nga opozita, Rama ditën e sotme pa “pikë turpi” e krahasoi Shqipërinë me Italinë për të cilën tha se ky shtet i madh i Bashkimit Europian po përballet me shqetësimin e emigracionit dhe largimin e të rinjve.
Kreu i qeverisë shqiptare e pranoi se ikjen e shqiptarëve drejt vendeve të tjera nuk e ndal askush madje theksoi se rritje e pagave në vendin tonë do ta “frenonte” këtë fenomen.
“Për sa i përket këngës së ikjes, Verona është në rajonin më të pasur të Italisë, ka një prodhim të brendshëm bruto 5 miliard, ka 600 mijë ndërmarrje, kemi pasur një darkë pune me guvernatorin, dhe e dini cili është shqetësimi i tyre; largimi i mjekëve, largimi i specialistëve më të lartë. Tani pse ikin? Se ka korrupsion? Jo, ikin se kjo është koha ku ne jetojmë, e bën të mundur që aspiratat më të larta të ndiqen duke shkuar në vendin ku pagat janë më të larta. Nuk ka asnjë forcë që të përmbysë këtë trend, duhet që të bëjmë progresin që mund të bëjmë dhe kjo rritje pagash do ndihmojë shumë po nuk do ta frenojë këtë trend. Flitet gjithmonë për të ikurit, thuhet shifra që e bëjnë atë 7 herë 7-42 sikur të jetë algjebër”, u shpreh Rama.
