Presidentja e Komisionit Evropian, Ursula von der Leyen, nënvizoi sot në Bruksel hapin e paprecedentë të ndërmarrë nga Gjykata Ndërkombëtare Penale në Hagë, duke lëshuar një urdhër arresti kundër presidentit rus Vladimir Putin.
“Tani, bota është “më e vogël” për Putinin, i cili rrezikon të arrestohet në më shumë se 120 vende”, tha ndër të tjera Von Der Leyen. Në një debat në miniplenarin e Parlamentit Evropian të fokusuar në rezultatet e Këshillit të fundit Evropian, numri një i ekzekutivit të BE-së përshëndeti urdhrin e arrestit të lëshuar nga gjykata në Hagë, pasi denoncoi krimet ruse të luftës në Ukrainë.
Është një hap i paprecedentë. Vendimi e ka bërë botën shumë më të vogël për Putinin. Nëse ai udhëton në një nga 123 vendet që bashkëpunojnë me Gjykatën Penale Ndërkombëtare, ai rrezikon të arrestohet.
