Nga Boldnews.al
Kryetari i Bashkisë së Korçës, Sotiraq Filo, vijon skandalet me prerjet e pyjeve në zonat më të bukura në juglindje të Shqipërisë. Raqka ka bërë herë pas herë tendera të kamufluar, ku hap procedura për pastrime pyjesh, por në fakt sëpata kërcet edhe në pemë të reja dhe të pa dëmtuara.
BoldNews.al ka siguruar dokumentet e një tenderi që ka hapur Bashkia e Korçës, ku objekti i kësaj procedure është “prerje, transport, stivosje dhe pastrim parcele”. Madje, për këto prerje, Raqka do të paguajë firmën fituese me një shumë prej 5.911.544 lekë pa TVSH, ose me TVSH rreth 60 mijë euro. Pra, një “sëpatë me leje” mbi pyjet në Korçë.
Po në cilën zonë?!
Në foto: Masivi pyjor Shtyllas në zonën e Vithkuqit në Korçë
Redaksia jonë mësoi se prerjet do të kryhen në zonën e Vithkuqit, në masivin pyjor Shtyllës, në afërsi të fshatit Çemericë. Zona është një nga më të gjelbëruarat, teksa është “mbrojtur” për vite me radhë. Por, hapja e rrugëve nga TAP-i ka sjellë që në atë masiv pyjor të shkojë sëpata.
Por sëpatë me leje! Pasi Raqka nuk mendon për mjedisin, por që të pasurohet duke masakruar pyje. Nëse më parë mijëra hektarë u prenë dhe u dogjën në zonë, kësaj herë bëhet gjithçka me disa letra, që në fakt janë vetëm mburojë, pasi zona pritet që të shpyllëzohet nga babëzia e krerëve të pushtetit lokal.
Sipas dokumenteve që disponon BoldNews.al, tenderi me objekt “prerje, transport, stivosje dhe pastrim parcele” ka një kohëzgjatje të kontratës deri në 31.12.2023, ndërsa proceset e punës si prodhimi i druve të zjarrit, transporti me kafshën ngarkim shkarkim dhe stivim dru zjarri dhe transport i largët do të kryhen deri në datën 30.09.2023.
Mësohet se zarfet do të hapen në datën 24 mars 2023 në Bashkinë e Korçës, teksa e njëjta bashki ka bërë edhe dhjetëra dokumente se ku do të ndërhyhet. Mësohet se emri i objektit është “rruga e traktorit”, në Njësinë Administrative Vithkuq në fshatin Çemericë.
Bashkëngjitur njoftimit të kontratës, Bashkia e Korçës ka përpiluar edhe disa specifikime teknike se ku do të ndërhyjnë. Ata shkruajnë se ndërhyrjet do të jenë në ekonominë pyjore “Sherrë – Panarit” dhe pritet që të shtrihet në një sipërfaqe totale prej 24.4 hektarësh. Në letra shkruhet se objekti është vetëm përmirësim pyjesh, rrallime/pastrime, çlirime.
“Objekti ndodhet në afërsi të fshatit Çemericë, rreth 15 km larg nga qendra e Njësisë Administrative Vithkuq dhe rreth 40 km larg nga qyteti Korçës. Rruga auto i kalon ngastrës në pjesën e sipërme dhe fundore të saj. Deri më tani është trajtuar si grumbull pyjor me funksion prodhues/mbrojtës”, thuhet në të njëjta dokumente.
Bashkia e Korçës ka ngarkuar në Agjencinë e Prokurimit Publik disa harta ku do të ndërhyjnë në zonë, ku duket qartë se zona ku do të priten pemët është e vetmja me kurorë të gjelbër.
“Ngastra ka një reliev pothuajse kodrinor-malor në formën e një shpati me një lartësi mesatare mbi nivelin e detit prej 1453 m. Pjerrësia e ngastrës është 22 gradë. Veshja bimore është pyll me ah dhe shelg i egër, ka pjesëmarrje të rrallë Bredhi të Bardhë, artificial, Panje. Mesatare deri e mirë, uniforme nga sipër ngastrës, në Jug, kalon rruga auto ka dhe variante rrugësh verore”, thuhet në të njëjta dokumente.
Më tej vijon se “në kuadrin e prerjeve kulturore do të ndikohet mbi përbërjen, dendësinë dhe strukturën e grumbullit, dhe për rrjedhim edhe në ndryshimin e kushteve mikroklimatike dhe edafike të pyllit”.
