Roja i televizionit kombëtar “Top Channel” është vrarë me armë zjarri gjatë natës, ndërsa drejt medias është qëlluar me breshëri plumbash.
Plumbat kanë prekur rojen e sigurisë që punonte pranë televizionit – Pal Kola, i cili ka ndërruar jetë.
Ngjarja
Dyshohet se u qëllua nga një makinë në lëvizje.
“Më datë 27.03.2023, rreth orës 01:00, në Mëzes, në rrethana ende të paqarta, nga persona ende të paidentifikuar, është qëlluar me armë zjarri në drejtim të ambienteve të Top Channel. Si pasojë e të shtënave ka humbur jetën roja i sigurisë shtetasi Pal Kola, 60 vjeç (punonjës i një shoqërie për ruajtjen fizike të objekteve)”, njofton policia.
Shërbimet e Policisë kanë ngritur pikat e kontrolleve dhe vijon puna për identifikimin e kapjen e autorëve, shtuan të njëjtat burime.
Pas sulmit me armë mbi Top Channel ku mbeti i vdekur roja i sigurisë Pal Kola, një automjet “Range Rover” është gjetur i djegur pranë Golemit, që dyshohet të ketë lidhje me të shtënat me armë drejt Top Channel rreth orës 01:00. Dy armë tip kallashnikov janë gjetur në mjetin që dyshohet se u përdor nga autorët në ngjarje. Automjeti rezulton i vjedhur, njesoj edhe targat e përdorura në mjet.
Ndërkohë, në vendin e ngjarjes janë gjetur rreth 25 gëzhoja kallashnikovi.
Të paktën 3 persona, ku njëri ka qenë në rolin e shoferit, dyshohet se kanë marrë pjesë në atentat.
Familjarët e viktimës thanë për mediat se ai kishte 6 muaj që punonte pranë televizionit. “Ecte disa kilometra në këmbë për të shkuar në punë, thanë ata.
Një prej fqinjëve e përshkruajti si njeri “të mirë dhe hallexhi”.“Unë e njoh shumë mirë, hallexhi, nuk është marrë me budalliqe. Për mua ka qenë njëri i mirë”, tha ai.
Momenti i të shtënave – Breshëria e plumbave dëgjohet në shtëpinë e “BBVIP”
Motivi
Vetë televizioni, në një deklaratë, e cilësoi ngjarjen një “akt terrorist”, ndërsa shtoi se arsyeja e sulmit lidhet me misionin e medias.
“Ky akt terrorist është i papreçedent ndaj një media kombëtare, e lidhet vetëm me misionin e saj të fjalës së lirë. Top Channel, aksionerët e tij e familjarët, drejtuesit, gazetarët e autorët, nuk kanë e nuk ka qënë kurrë objektiv i ndonjë sulmi individual që prej themelimit të tij, gjithçka në këtë akt terrorist, lidhet dhe ka të bëjë vetëm me misionin e Top Channel. Ky krim i paprecedentë e akt terrorist, kërkon menjëherë reagim të përgjegjshëm e të ashpër nga Policia e Shtetit dhe institucionet e drejtësisë, për të vënë përpara përgjegjësisë autorët e vrasjes”, thuhet në deklaratë.
Një kundërpërgjigje ndaj publikimeve të “TCH”, sipas burimeve pranë grupit hetimor, është një nga pistat e hetimeve për shkakun e ngjarjes.
Reagimet
Organizatat e mediave dhe politika kanë dënuar ngjarjen.
“Agresioni kriminal ndaj TCH me pasojë edhe një humbje jete të personelit të sigurisë, kërkon përgjigje të qartë nga agjencitë ligjzbatuese! Ngushëllime familjes së të ndjerit dhe krejt bashkësisë së TCH, e cila meriton solidaritetin e të gjithëve në këtë moment kaq shqetësues”, shkroi në Twitter kryeministri Edi Rama, i cili disa muaj më parë ka pasur një përplasje të hapur me televizionin.
Kryetari i PD-së, Sali Berisha tha se akti kriminal është dëshmi tjetër e dhimbshme e pasigurisë së plotë, që ekziston sot në vend nga vendosja e rendit nga regjimi në duart e krimit.
