Belind Këlliçi premtoi këtë të Shtunë se një ndër vendimet e tij si kryebashkiak i Tiranës do të jetë heqja e çdo tarife për transportin publik, për qytetarët.
“Transporti publik do jetë falas”, theksoi kandidati i opozitës për Bashkinë e Tiranës në lokalet e 17 Majit, gjatë një takimi me të rinjtë e FRPD. Këlliçi tha se me këtë vendim, Tirana do të kthehet në vendin e dytë në Europë ku ofrohet ky shërbim falas.
Lidhur me fondet e nevojshme për realizuar këtë premtim, Belind Këlliçi tha se paratë e Bashkisë, nën drejtimin e tij, nuk do të shkojnë te kompanitë e inceneratorëve, por në shërbime për qytetarët.
“Ku do i gjej paratë? Inceneratori i Tiranës është një aferë shumë e madhe që ka të bëjë me një incenerator që bëhet venddepozotimi i plehrave, qytetarët paguajnë 80 mijë euro në ditë për pastrimin e qytetit dhe për këtë proces që i merr 41 mijë euro në ditë për një shërbim që nuk kryhet, pas 15 majit qytetarët e Tiranës do jenë 41 mijë euro më të pasur se Belind Këlliçi paratë s’do i çojë te inceneratori, por tek qytetarët. Miliona euro që do shkojnë në xhepat e qytetarëve s’do shkojnë më në atë destinacon por për kopshte, cerdhe, shkolla, rrugë dhe ujë të pijshëm. Një nga premtimet kryesore e kam për uijn e pijshëm”, tha ai.
