Deputeti i PD-së Oerd Bylykbashi po insiston për të futur në rendin e ditës, mocionin me debat për raportin e DASH mbi Shqipërinë.
Bylykbashi iu drejtua kryetares së Kuvendit duke i kërkuar të zbatojë rregulloren, sepse me qëndrimin që po mban nuk po tregon tjetër veçse po rikonfirmon se opozitës po i ngushtohet mundësia e kontrollit mbi qeverisjen.
“Ne kemi kërkuar ndryshimin e rendit të ditës, specifikisht një debat në lidhje me raportin e DASH. Tjetër gjë, çfarë duhet të sqarojmë më tepër ne?!
Sot nuk ka gjë tjetër përveçse rikonfirmin të asaj që kemi thënë një vit e gjysmë:Opozitës po i ngushtoni çdo hapësirë kontrolli mbi mazhorancën. Por kur këtë e thonë edhe raportet ndërkombëtare, ju insistoni më shumë.
Ju folët për një rend dite të zakonshëm. Për çfarë?! Vulosjen e kontratave koncesioneve për portin e Durrësit ku dilni me humbje dhe duke humbur pasurinë më strategjike që ka ky vend?!
Pse?! Vetëm që të pasurohen ata që doni ju. Nuk e doni këtë lloj debati edhe pse del në këtë raport. Pra, ne sot kërkojmë zbatimin e rregullores dhe mocionin me debat!”– këmbënguli Bylykbashi.
