Gjermania do ta nisë rrugëtimin “formal” drejt “Euro 2024” nga data 25 mars, aty ku Peruja është “identifikuar” si kundërshtari i radhës. Çështja e zgjedhjes së lojtarëve në këtë periudhë ka shkaktuar mjaft diskutime, si brenda grupit ashtu edhe në media. Lotar Mateus nuk i ka shpëtuar vorbullës së diskutimeve të tilla.
“Rekordmeni” gjerman e ka kaluar fokusin në dyshen e Bajernit Myler-Sane, të cilët për fatin e keq nuk bëjnë pjesë në miqësoret e marsit. “Reparti ofesiv ka pësuar dyndje muajt e fundit, aty ku emrat potencialë për ta nisur si titullar nuk mungojnë. Lënia e Mylerit jashtë kësaj përzgjedhjeje nuk nënkupton se i dha duart përfaqësueses.
Por duhet ta pranojmë se pozita e startuesit do të jetë mjaft e ashpër. Kur ke në gji talente të jashtëzakonshme si Musiala dhe Virc ta bëjnë punën më të vështirë, nëse mendon edhe ‘veteranët’.
Ndërsa për sa i përket çështjes së Sanes, ndryshon qëndrimi. Të gjithë e njohim Hansin si strateg dhe personazh që aplikon ‘dorën e hekur’, çka nënkupton se sjelljet e gabuara ndëshkohen, pikërisht mungesa e disiplinës nga Leroi ka ndikuar në vendimin final. Mbajtja e frymës pozitive gëzon reputacion të veçantë në punën e 58- vjeçarit dhe Sane e ka shkelur limitin”, pohoi 62-vjeçari në pozitën e ekspertit.
