“Lëvizja Bashkë” pritet t’i drejtohet nesër Kolegjit Zgjedhor, ku do të kërkojë prishjen e vendimit të dhënë nga kryekomisioneri Ilirjan Celibashi që nuk e regjistroi në zgjedhje.
Në një njoftim që përfaqësuesit e kësaj lëvizje kanë bërë në rrjetin social FB, shprehen se sot regjistrimi i lëvizjes së tyre mori formë të prerë.
Sipas tyre, padrejtësitë kanë nisur nga gjykata për të përfunduar në Kolegjin Zgjedhor.
Deklarata
“Pas shumë peripecish e zvarritjesh burokratike, nesër në orën 15:00 mbahet seanca e Kolegjit Zgjedhor ku do të vendoset nëse Lëvizja BASHKË do të marrë pjesë në zgjedhjet e 14 majit si subjekt politik. Në fillim ishte Agron Zhukri, i cili e caktoi seancën për njohjen e subjektit tonë një ditë pas afatit të Komisionit Qendror të Zgjedhjeve. Pas presionit të opinionit publik, ai u zëvendësua dhe njohja nga gjykata u bë më 2 mars. Më pas ishte Ilirjan Celibashi, kreu i KQZ që – edhe pse dokumentacionin e depozituam në kohë – zgjodhi ta interpretojë ligjin sipas interesit të Edi Ramës, duke na e refuzuar regjistrimin në zgjedhje me pretendimin se vendimi i gjykatës nuk ishte i formës së prerë. Sot, 15 ditë më pas, Gjykata e Tiranës shpalli njohjen e subjektit politik Lëvizja BASHKË me vendim të formës së prerë. Këtë vendim ne nesër do ta paraqesim në hallkën e fundit vendimmarrëse: në Kolegjin Zgjedhor Gjyqësor të Gjykatës Administrative të Apelit“, thuhet në njoftim.
“Ne shpresojmë se trupa gjykuese e Kolegjit Zgjedhor do të bëjë drejtësi duke e hedhur poshtë vendimin e KQZ dhe duke e regjistruar Lëvizjen BASHKË në zgjedhje. Cilido qoftë vendimi, me mbështetjen e 7000 qytetarëve të Tiranës ne do të kandidojmë në këto zgjedhje, si subjekt politik ose si kandidat i pavarur”, vijon njoftimi.
