Derbi i Romës si gjithmonë është shoqëruar me tension dhe përplasje. Në fund të sfidës, ka pasur të tilla në fushë, por edhe në tunelin që çon në dhomat e zhveshjeve. Mediat italiane kanë zbuluar një përplasje mes presidentit të Lacios, Klaudio Lotito dhe trajnerit të Romës, Jose Mourinho.
Në fund të sfidës, Murinjo i skualifikuar, kishte marrë leje nga Federata që të shkonte në dhomat e zhveshjeve për të folur me lojtarët e tij dhe për t’i ngushëlluar pas humbjes.
Por në tunel ai ka gjetur një situatë të tensionuar me Mançinin i cili po përplasej me Luis Alberton e Romanjolin, ndërsa Lotito po mundohej të ndante palët.
“Çfarë ke që sheh?!”, mësohet t’i ketë thënë Murinjo-Lotitos, i cili i është përgjigjur menjëherë. “Çfarë ke që sheh ti. Unë jam presidenti i Lacios. Ti kush je? Je edhe i skualifikuar, këtu nuk mund të hysh”, kanë qenë fjalët e presidentit të bardhekaltërve.
Situata është tensionuar edhe më shumë dhe është dashur ndërhyrja e drejtorit sportiv të Romës, Tiago Pinto për të qetësuar gjakrat, ndërsa zyrtarët e Ligës Italiane kanë mbajtur shënim këtë incident.
