Për të dytën ditë radhazi 70 punonjës të OSHEE Krujë kanë vijuar protestën, duke kundërshtuar arrestimin e kolegëve të tyre.
Bëhet fjalë për ngjarjen e ndodhur në fshatin Halil nga një aksion antidrogë të ndërmarrë nga policia është konstatuar një tunel i braktisur i ushtrisë ku janë konstatuar fidanë kanabisi.
Protestuesit thonë se janë njoftuar punonjësit e OSHEE të zonës për të gjetur lidhjen e energjisë elektrike të këtij tuneli. Sipas tyre, është konstatuar me vështirësi të madhe pasi kishte mbi një kilometër kabull të shtrirë nën tokë pranë një shtylle e cila ishte shpuar në bazamentin dhe vizualisht ishte e pamundur të identifikohej.
Më pas, shtojnë se janë detyruar të bëjnë kontroll nga lart të të gjitha shtyllave në zonë derisa është konstatuar lidhja e jashtëligjshme e cila furnizonte tunelin që shërbente si serë. Në bashkëpunim me policinë, punonjësit thonë se kanë ndenjur në gatishmëri duke i ndihmuar për çdo nevojë që policia kishte.
Por, më tej shtojnë se 8 prej tyre janë shoqëruar në polici ku janë marrë në pyetje për mënyrën sesi ishte bërë lidhja e tunelit. Në këtë moment është prerë fletë-arresti për 4 prej tyre, ndërsa 4 të tjerë janë lënë të lirë.
70 punonjësit të cilët kanë vijuar të protestojnë edhe sot kanë deklaruar se nuk ofrojnë asnjë shërbim, duke përjashtuar familjet me pjesëtarë me nevoja të veçanta. Punonjësve të OSHEE i janë bashkuar edhe punonjës të OSSH.
Lidhur me aksionin, Policia njoftoi zyrtarisht dje se tuneli furnizohej me energji elektrike të pandërprerë, nëpërmjet një lidhjeje të paligjshme të energjisë elektrike, në shtyllën e tensionit në fshatin Halil, Fushë Krujë, lidhje për të cilën ka qenë e nevojshme patjetër ndërhyrja e specializuar e punonjësve të OSHEE-së së zonës.
Për këtë arsye, shton se u bë arrestimi i punonjësve së OSHEE-së, shtetasve Oltjan Farruku dhe Ervis Halili, me detyrë punonjës të OSHEE-së Fushë Krujë, për veprën penale “Shpërdorimi i detyrës”. Gjithashtu, u shpallën në kërkim 2 punonjës të tjerë të OSHEE-së, shtetasi S.K., me detyrë përgjegjës i grupit të OSHEE-së (i arrestuar dhe më parë për këtë paligjshmëri) dhe shtetasi E. K., me detyrë elektricist i zonës.
Lexo edhe:
Tuneli i hashashit në Krujë, 3 të arrestuar/ Në pranga dhe 2 punonjës së OSHEE
