Një tunel i përshtatur për kultivim kanabisi është zbuluar në fshatin Krasë të Krujës.
Tre persona janë arrestuar si autorë të dyshuar të kultivimit të lëndëve narkotike. Në pranga janë vënë dhe 2 punonjës të OSHEE-së, ndërsa 2 të tjerë janë shpallur në kërkim, pasi akuzohen se kishin lejuar lidhjen e paligjshme të energjisë elektrike me të cilën furnizohej tuneli i përshtatur për kultivim të bimëve narkotike.
Aksioni
“Në zonën e mbrojtur mjedisore Krastë, u evidentua një tunel (ish-tunel i ushtrisë), në një zonë të vështirë kalimi, i përshtatur për kultivim të bimëve narkotike me anë të llambave. Gjatë kontrollit u gjetën dhe u sekuestruan në cilësinë e provës materiale 390 bimë të dyshuara narkotike cannabis sativa, sistem ndriçimi me 30 llamba, 1 aspirator, 2 ventilatorë, 30 rritës të energjisë elektrike, si dhe pajisje të tjera që shërbejnë për kultivimin e bimëve narkotike”, njoftoi policia.
Personat e arrestuar janë Haki Selimi, 61 vjeç dhe Rexhep Halili, 58 vjeç, të dy banues në banues Halil, Krujë, si dhe Arlind Selimi, 21 vjeç, banues Fushë Krujë. Nga hetimet rezultoi se Arlind Selimi ushtronte edhe veprimtarinë e paligjshme të lojërave të fatit.
Në vijim të veprimeve hetimore u konstatua se tuneli furnizohej me energji elektrike të pandërprerë, nëpërmjet një lidhjeje të paligjshme të energjisë elektrike, në shtyllën e tensionit në fshatin Halil, Fushë Krujë, lidhje për të cilën ka qenë e nevojshme patjetër ndërhyrja e specializuar e punonjësve të OSHEE-së së zonës. Për këtë arsye u bë arrestimi i punonjësve së OSHEE-së, shtetasve Oltjan Farruku dhe Ervis Halili, me detyrë punonjës të OSHEE-së Fushë Krujë, për veprën penale “Shpërdorimi i detyrës”. Gjithashtu, u shpallën në kërkim 2 punonjës të tjerë të OSHEE-së, shtetasi S.K., me detyrë përgjegjës i grupit të OSHEE-së (i arrestuar dhe më parë për këtë paligjshmëri) dhe shtetasi E. K., me detyrë elektricist i zonës.
Vijon puna hetimore për identifikimin e shtetasve të tjerë të përfshirë në këtë veprimtari, ndërsa materialet i kaluan Prokurorisë, për veprat penale “Kultivimi i bimëve narkotike”, “Vjedhja e energjisë elektrikë”, “Organizimi i lojërave të fatit” dhe “Shpërdorimi i detyrës”, mbyllet njoftimi i bluve.
Arrestimi i punonjësve të OSHE-së ka nxitur një protestë të punonjësve të këtij institucioni.
“Policia po bën arrestime tendencioze”, 70 punonjës të OSSHE-së në Krujë në protestë
