Mbledhja e Asamblesë së Partisë Socialiste në Sarandë mbrëmjen e së martës (14 mars) është shoqëruar me tensione.
Mësohet se debati ka ndodhur mes anëtareve të Asamblesë dhe deputetëve lidhur me kandidaturat e mundshme për kryetar bashkie.
Gjatë mbledhjes ku u diskutua mbi përgatitjet për zgjedhjet e 14 majit, pjesa dërrmuese e anëtarëve të Asamblesë së PS, kanë dalë në mbështetje të Adrian Gurmës, duke dalë kundër qëndrimit të Blendi Klosit, i cili mbështeti kandidaturën e Oltion Çaçit.
Mësohet se ata e kanë quajtur “kandidaturë të importuar atë të Oltion Çaçit”, i cili sipas tyre nuk ka asnjë lidhje me Sarandën.
Gjatë mbledhjes, përveç Adrian Gurmës dhe Oltion Çaçit, janë propozuar edhe emrat e Gjergji Mërkurit dhe Dhonat Kotes, si kandidatura të mundshme.
Gjergj Mërkuri është regjistruar para pak ditësh si i pavarur në KZAZ e Sarandës.
