Ernest Muçi është kthyer në një nga elementët më të rëndësishëm të Legias së Varshavës në këtë edicion në Poloni duke ndihmuar skuadrën e tij që të qëndrojë në podiumin e kampionatit. Edhe sot ai ishte protagonist me një asist, në fitoren 2-0 të skuadrës së tij ndaj Stal Mielec.
Në ndeshjen ku ish-sulmuesi i Tiranës ishte si zakonisht titullar, Muçi la shenjë në fundin e pjesës së parë të sfidës, teksa dha një pasim “me telekomandë” nga e majta për Pekhart. Sulmuesi nuk gaboi me gjuajtjen e tij me kokë, duke i dhënë avantazhin 1-0 Legias.
Kjo e fundit më pas shënoi edhe golin që vulosi suksesin 2-0 në minutat e fundit të pjesës së dytë, teksa vetë Muçi ishte në fushë deri në minutën e 83-të.
Asisti i sotëm ishte i 5-ti në këtë kampionat për Muçin, i cili ka shënuar edhe 3 gola në 23 ndeshjet ku ka luajtur deri tani.
