Mbledhja e Kryesisë së PS që nisi prej orës 08:30 ka përfunduar pas më shumë se një orë e gjysmë diskutimesh në lidhje me procesin e zgjedhjeve lokale të 14 Majit dhe emrat e mundshëm të kandidatëve që do të përzgjedh Edi Rama.
Pavarësisht zhvillimeve në spektrin politik, Kryesia në selinë rozë do të mblidhet sërish jo më larg se 25 marsi, ditë kur Rama do të zyrtarizojë 61 kandidatët për zgjedhjet lokale të “14 Majit”.
I pyetur nga gazetarët në përfundim të mbledhjes nëse mazhoranca e ka të qartë se kush do të jenë kandidatët e saj, Rama u përgjigj duke thënë se “pak a shumë, po”.
“Pak a shumë po. Aty ku faktikisht ka pasur dakordësi dhe sinkronizim rreth kandidatëve të caktuar që janë aktualisht kandidat bashkie ka vazhduar normalisht procesi. Pak a shumë jemi në linja të përgjithshme dhe e dimë se cila do të jetë skuadra e kandidatëve për bashkitë”, u shpreh kryeministri.
Lidhur me pritshmëritë nga këto zgjedhje dhe sesa bashki mund të fitojë Partia Socialiste sipas sondazheve të vetë kësaj force politike, Rama tha se duhet të kalojnë mesataren aritmetike pasi kanë kundërshtar të dobët përballë.
“Mendojmë që do fitojmë shumë bindshëm, po për hir të së vërtetës dua të jem i drejtpërdrejt, fitorja kur ke përballë kundërshtarë të tillë në aspektin aritmetik është minimumi. Të hysh në fushë me kundërshtarë që nuk janë në lartësinë e duhur nuk është e vështirë të fitosh. Çështja është të shkosh përtej fitores aritmetike. Ne duhet të shkojmë përtej fitores aritmetike, pasi të hysh në fushë me kundërshtarë të padenjë për të qenë në fushë, çështja është të shkosh më tej se fitorja aritmetike”, nënvizoi ai.
Gazetarët shfaqën interes për të mësuar më tepër edhe rreth nismës së PS për të çuar përpara ligjin për dekriminalizimin e partive politike, që shihet si një tentativë e Ramës për të penguar Partinë e Lirisë që të regjistrohet në zgjedhje me Ilir Metën kryetar.
Teksa u pyet drejtpërdrejt për kreun e PL, Rama tha: “Nuk kemi asgjë me persona të posaçëm dhe nuk nisemi nga persona të posaçëm kur bëjmë ligjet, por për spiunët po do t’i heqim nga politika”.
