Për deputetin demokrat Luan Baçi vendimi i djeshëm i Gjykatës së Apelit, për të çuar për rigjykim çështjen e vulës së PD, jo doemos i jep të drejtën Enkelejd Alibejat që të regjistrohet në këtë sigël për zgjedhjet e 14 majit.
Sipas Baçit, grupi “Alibeaj” do ta ketë të pamundur regjistrimin në KQZ, pasi vendimi për ta rikthyer çështjen në Shkallën e Parë, do të ankimohet prej PD së drejtuar nga Sali Berisha.
“Nuk ekziston mundësia e regjistrimit të Partisë Demokratike, as të atyre që menduan se mbajtën atë vulën e vjetër. Nuk regjistrohen dot, për arsye se vendimi i Gjykatës së Shkallës së Parë është marrë dhe ka bërë regjistrimin e Partisë Demokratike me Kuvendin e 11 dhjetorit.
Rrëzimi që i bën Apeli dhe e rikthen çështjen përsëri te Gjykata e Shkallës së Parë, do të ankimohet në Gjykatën e Lartë. Kur ankimohet në Gjykatën e Lartë, absolutisht këta nuk kanë të drejtën të shkojnë te KQZ-ja”, shpjegoi Baçi në Euroneës Albania.
Më tej, deputeti i PD hodhi akuza të forta në drejtim të kolegut të tij Enkelejd Alibeaj, duke e cilësuar turpin e selisë blu, pasi është shitur kokë e këmbë te Edi Rama.
“Ai është një amalgam, është një trup i vërtetë. Alibeaj do të mbahet mend në historinë e Partisë Demokratike, si njeriu që ka dëmtuar më shumë Partinë Demokratike nga kushdo tjetër dhe si një njeri që absolutisht, me veprimet e tij të ndërgjegjshme, e dëmton Partinë Demokratike dhe i shitur te Edi Rama kokë e këmbë”, theksoi ai.
Baçi gjithashtu sqaroi se grupi Alibeaj është inekzistentë në bazë, pasi nuk ka forume dhe është vetëm një grumbull individësh që s’kanë lidhje me Partinë Demokratike, të cilëve Enkelejd Alibeaj u thotë se do t’i fusë në zgjedhje.
“Është për të ardhur keq kur themi do mbledhë Alibeaj forume. Forumet e Alibeajt janë inekzistente, për arsye se të gjitha ata që kanë qenë, janë larguar. Alibeaj çfarë ka bërë tashmë? Ka gjetur individë pa lidhje fare, i ka marrë i ka regjistruar, u thotë; ju jeni Kryesi, ti je në Këshillin Kombëtar”, deklaroi deputeti i PD.
