Protesta e thirrur nga opozita për t’u zhvilluar ditën e nesërme në bulevardin “Dëshmorët e Kombit”, ka bërë që policia të mobilizohet maksimalisht, pasi rreth të njëjtës orë pritet që edhe Gjykata e Apelit të marrë vendimin për çështjen e “Vulës” së PD.
Edhe pse krydemokrati Sali Berisha e ka bërë të qartë në daljet e tij për mediat se mbajtja e tubimit në të njëjtën ditë kur Gjykata vendos fatin e Partisë Demokratike është koicidencë, duket se autoritetet i druhen zhvillimeve pas vendimit.
Policia ka publikuar në mesditë një plan masash në lidhje me protestën kombëtare, por Panorama TV ka zbuluar më shumë detaje rreth mënyrës si do të veprohet për të ruajtur sigurinë para Kryeministrisë.
Kështu mësohet se në terren do të jenë të angazhuara edhe Forcat e Ndërhyrjes së Shpejtë bashkë me efektivët e repartit “Shqiponja”.
Nuk do të mungojë në planin e masave as një pikë që përfshin ndërhyrjen e forcave RENEA, të cilat do të qëndrojnë në gatishmëri, por më të tërhequra.
Gjithashtu pritet të ketë survejim mbi godinat e institucioneve, ndërkohë që dyert e kryeministrisë do të vishen me mbështjellëse metalike njëjtë si në protestat e mëparshme.
Ndërkohë, shtyllat në bulevardin “Dëshmorët e Kombit” do të lyhen me graso dhe katër autobote të policisë do të jenë në gatishmëri për të shpërndarë turmën në rast se do të ketë incidente apo përplasje.
