Një 38-vjeçar shqiptar, i cili mbërriti në Britaninë e Madhe me një gomone duke realizuar kalimin e rrezikshëm në Kanalin Anglez është dënuar me burg, pasi u arrestua nga policia në një “shtëpi bari”, në Burslem të Stoke on Trent.
Mediat lokale raportojnë se Osli Tafani ishte kopshtari që kujdesej për rritjen e bimëve në shtëpinë e ndodhur në ‘Barber Street’.
Ai u arrestua kur policia bastisi pronën në orën 18:00, më 12 dhjetor. Policia gjeti 120 bimë kanabis të rritura në një dhomë gjumi, 145 bimë kanabisi të prera dhe në proces tharjeje në një dhomë tjetër gjumi dhe 150 fidanë në papafingo.
38-vjeçari në sallën e gjyqit ngriti pretendimin se ishte detyruar të kujdesej për bimët e kanabisit për të shlyer borxhin e tij prej 10,000 £ ndaj bandës që e kishte trafikuar në Britani.
Pavarësisht alibisë së tij, Tafani është burgosur për 11 muaj nga Gjykata e Stoke-on-Trent.
Prokurori David Bennett tha se policia e gjeti Tafanin të fshehur në papafingon e shtëpisë.
Në intervistën e tij në polici, Tafani tha se mbërriti në Britani në gusht të vitit 2022, pasi kishte parë një video në rrjetet sociale që ofronte për të çuar shqiptarët në Mbretërinë e Bashkuar.
“Ai u nis drejt Britanisë së Madhe për të punuar në industrinë e ndërtimit dhe mbërriti me një gomone. I morën pasaportën dhe dokumentet e identitetit. Fillimisht ai u dërgua në një hotel në Londër. Më pas u kontaktua nga disa njerëz që e kërcënuan atë dhe familjen e tij. Atij iu tha se do të duhej të bënte punën që ata i kishin ofruar ose do të vritej. Gjithashtu i thanë se 10,000 £ ishin paguar për kalimin e tij në Britani dhe duhej të punonte për të shlyer borxhin”, tha avokati i tij mbrojtës para gjykatësit.
Sipas 38-vjeçarit, ai besonte se po vëzhgohej nga banda dhe nëse do të largohej dhe do të kontaktonte policinë do të vritej prej tyre.
