Aktorja e njohur e kinematografisë shqiptare dhe teatrit, Eva Alikaj është banorja më e re e shtëpisë së Big Brother VIP Albania. Eva hyri gjatë spektaklit të kaluar në shtëpinë më të famshme në Shqipëri, duke surprizuar të gjithë konkurrentët e tjerë.
Teksa një pjesë e tyre po luanin një pjesë nga shfaqja ‘Pallati 176’, Eva hyri papritur në shtëpi, teksa thuajse të gjithë banorët bërtitën njëzëri ‘Elsa’. Më e lumtur nga të gjitha u duk këngëtarja Valbona Mema, e cila u gëzua kur moderatorja e programit, Arbana Osmani u shpreh se Eva është hyrja e re në program.
Kujtojmë që Eva Alikaj është një nga aktoret më të dashura për publikun shqiptar. Roli i saj më i njohur është pa diskutim ai i ‘Elsës’ në shfaqjen ‘Pallati 176’, ku ajo ka fituar edhe zemrat e publikut.
Në shtëpinë e Big Brother VIP, tashmë shtohet një tjetër aktore, teksa ky edicion i dytë do të mbahet mend për numrin e madh të aktorëve që janë bërë pjesë, që prej 24 dhjetorit e deri më sot.
