Një automjet tip “BMW X6” në të cilën u gjetën tre armë zjarri dhe lënde djegëse, të bëra gati për kryerjen e një vrasje, u gjet nga policia në Elbasan, në orët e para të mëngjesit të kësja të diele.
Mjeti luksoz qëndronte i parkuar në zonën e njohur si “ish-Konservimi”, vetëm 50 metër larg pallatit ku banon familja e Erion Alibej (alias Agim Shyrbi), të arrestuarit për vrasjen e Emiljano Ramazanit dhe Regis Runajt, të ndodhur në korrik të 2020, me një diferenë prej 10 ditësh nga njëra-tjetra.
“BMW X6” ndodhej brenda një godine të braktisur, në afërsi të së cilës ndodhet një kosh mbeturinash ku u gjet një çantë me një armë zjarri pistoletë brenda saj.
Në fotot e siguruara nga vendngjarja, shihet prezencë e lartë e forcave të policisë.
Hetimet për këtë ngjarje vijojnë dhe dyshimet janë se mjeti do të përdorej për një ekzekutim nga dy vrasës me pagesë.
Një nga pistat e hetimit mund të jetë edhe vrasja për hakmarrje, e lidhur me vëllezërit Spahiu, njëri prej të cilëve kunat me Erjon Alibejn.
Pranë pallatit ku është gjetur makina “BMW X6” me 3 kallashnikovë ndodhet edhe apartamenti i Arben Spahiut, vëllai i Ardit Spahiut i vrarë në Belgjikë dhe Rigers Spahiut, i kapur në tetor 2022 me një arsenal armësh në Elbasan.
Arben Spahiu jeton me gruan në të njëjtin pallat ku jeton edhe nëna, motra dhe gruaja e Erjon Alibejt, pasi është i martuar me motrën e tij.
Por një dyshim tjetër është se duke qenë se mjeti ka qëndruar për një kohë shumë pranë shtëpisë së Erjon Alibej, ai mund të përdorej nga grupi i tij për të goditur kundërshtarët e tij, mes tyre dhe Elton Kilën.
Deri në këtë fazë, policia ka fiksuar disa gjurmë gishti në makinë dhe oficerët shprehen optimistë për identifikimin e personave që kanë përdorur mjetin. Makina është mbajtur në vëzhgim, por për rreth një javë nuk është paraqitur asnjë person pranë saj. Mbrëmjen e djeshme, policia ka ndërhyrë, duke vijuar veprimet me marrjen e gjurmëve të gishtave.
