Policia italiane ka shkatërruar një rrjet trafikantësh që shpërndante kokainë në zona të ndryshme të Italisë, duke vënë në pranga 10 persona dhe sekuestruar 100 kg lëndë narkotike me vlerë 20 milionë euro.
Sipas të dhënave paraprake, lënda narkotike u sekuestrua në Torino, ndërkohë që grupi kriminal drejtohej nga një 37 vjeçar shqiptar emri i të cilit nuk bëhet me dije për arsye hetimore.
Ajo që bëri më shumë përshtypje te policia italiane ishte mënyra sesi grupi e kishte fshehur lëndën narkotike. Trafikantët kishin hequr pjesën e brendshme të rrotave të djathit Grana Padano dhe e kishin zëvendësuar me paketime kokaine.
Organizata furnizohej me sasi të mëdha kokaine nga Holanda dhe pasi droga mbërrinte në Itali shpërndahej me kamionë të marrë me qira në provincat e Asti, Alessandria dhe Cuneo dhe në zona të tjera të Italisë veriore.
