Një ngarkesë e madhe me drogë, e nisur nga Ekuadori është sekuestruar mesditën e sotme në portin e Pireut, në Athinë.
Mediat helene raportojnë se mbi 57 kilogramë kokainë u zbuluan dhe sekuestruan në një kontejner që vinte nga Ekuadori.
Nëndrejtoria e Narkotikëve të Atikës, pas vlerësimit të informacionit në lidhje me futjen me një kontejner në Greqi përmes rrugëve detare të një sasie të madhe kokaine nga Ekuadori, ka arritur të lokalizojë kontejnerin specifik brenda portit dhe ta vendosë nën survejim.
“Në veçanti, më datë 07.02.2023 është kryer kontroll universal i kontejnerit, me pjesëmarrjen e Drejtorisë së Doganave Pire, Prokurorisë së Drogës dhe Kontrabandës dhe Prokurorisë për Narkotikët në S.D.O.E. Si rezultat i kontrollit, brenda sistemit të ftohjes së kontejnerit u gjetën 50 pako kokainë, me peshë totale 57 kg e 195 gram”, njofton Antidroga e Atikës.
Përfitimi i pritshëm nga shitja e sasisë së konfiskuar të kokainës, llogaritet të kalonte 2 milionë euro.
Sakaq, një hetim paraprak po kryhet nga Nëndrejtoria e Prokurorisë së Narkotikëve dhe tashmë është zhvilluar bashkëpunimi me Autoritetet përkatëse jashtë vendit, për identifikimin dhe kapjen e autorëve që do të zbarkonin në kryeqytetin helene një sasi të tillë droge.
