Në 15-vjetorin e Shpalljes së Pavarësisë së Kosovës, një deklaratë “bombë” ka ardhur nga kandidati për president i Serbisë, Nikola Sanduloviç.
Ai ndodhet në një vizitë zyrtare në Kosovë dhe paraditen e sotme, i shoqëruar nga krerët e shtetit të kosovar ka kryer homazhe në varrezat e Memorialit në Prekaz.
Por jo vetëm kaq, pasi Sanduloviç teksa ka folur për mediat ka kërkuar falje për krimet e kryera nga regjimi i Sllobodan Millosheviçit në Kosovë.
Pas homazheve ai tha se do të bëjë gjithçka që kriminelët, të cilët kryen një krim kaq të tmerrshëm të përgjigjen para drejtësisë.
“Është ditë e vështirë dhe nder i madh që më është mundësuar nga kjo qeveri, me presidenten tuaj të nderuar dhe kryeministrin tuaj të nderuar, të më bëjnë të mundur që në emër të Serbisë së ndershme, të kërkoj një ndjesë të madhe dhe të kërkoj falje për të gjitha krimet e kryera nga Millosheviçi dhe kjo qeveri aktuale në Serbi, që kanë bërë ndaj jush. Do të bëj gjithçka që kriminelët që kryen një krim kaq të tmerrshëm ndaj jush të përgjigjen… Zoti ju bekoftë me shëndet dhe Zoti na dhëntë një paqe të merituar për të gjithë, faleminderit”, u shpreh Sanduloviç.
