Për analistin Baton Haxhiu është e gabuar mënyra sesi kryeministri Edi Rama po përpiqet të shmangë debatin dhe përplasjet me opozitën për aferën McGonigal, duke mos shkuar në Kuvend.
Sipas Haxhiut, detyra e thërret kryeministrin e vendit që të shkojë në Kuvend për të dhënë llogari për skandalin me Charles McGonigal. Madje në “Çim Peka Live”, analisti tha se ai shef qeverie që i shmanget ballafaqimit në Parlament, rrezikon të anojë nga autokracia.
“Kryeministri duhet të jetë në interpelancë dhe të vazhdojë debati. Një kryeministër e ka një ndjenjë të keqe kur del në interpelancë për të dhënë sqarime të cilat ndonjëherë i takojnë vetëm qeverisë. Prandaj demokracia përfaqësuese e largon njeriun nga të qenit autokrat. Secili kryeministër është i detyruar të shkojë në Parlament“, u shpreh Baton Haxhiu.
Analisti gjithashtu e quajti të gabuar vendimin e kryeparlamentares Lindita Nikolla për të përjashtuar deputetët e opozitës nga seancat plenare.
“Jam kundër që deputetët të përjashtohen, jam kundër që parlamentarizmi të zhvillohet në rrugë. Deputetët duhet të jenë aty”, nënvizoi ai.
