Mjedisi politik dhe opnioni publik në Kosovë është tronditur këtë të enjte nga një deklaratë e fortë e deputetit të “Vetëvendosje”, Haki Abazi, i cili ka implikuar kryeministrin Albin Kurti në rastin e zhdukjes së mostrave të aktivistit të ndjerë të VV-së, Astrit Dehari në Institutin e Mjekësisë Ligjore.
“Audio-incizimet konfirmojnë diskutimin ndërmjet Saranda Bogujevcit, Mimoza Kusarit e Dejona Mihalit për ngulfatjen e zërit të deputetëve brenda Kuvendit. Video-incizimet janë ato që ju duhet t’i kërkoni për të konfirmuar se kush ka zhdukur mostrat e Astrit Deharit”, tha fillimisht Abazi.
Më tej ai shtoi se ekzistojnë video-inçizime që e konfirmojnë identitetin e personit/personave që i zhdukën mostrat e rastit Dehari, aktivistit që vdiq në rrethana të dyshimta në Qendrën e Paraburgimit në Prizren.
Abazi thotë që ka bërë një hulumtim dhe se ka shtruar pyetje e diskutime në lidhje me rastin, çka kishte sjellë edhe anatemimin dhe shkarkimin brenda “Vetëvendosjes”.
“Hulumtimi im, diskutimet që kam bërë me njerëz përgjegjës kanë sjellur tek shkarkimi dhe anatemomi brenda VV-së. Shkarkimi im është minor ndaj borxhit që kemi se ka ka ndodhur me rastin Dehari, si është e mundur në pushtetin e VV-së të zhduken mostrat e Astrit Deharit, dhe kryeministri Kurti të mos e thotë asnjë fjalë të vetme. As si deputet nuk mund të rrijmë të heshtur përballë një procesi të tillë, dhe duhet ta kryejmë punën që na takon për ta zbardhur këtë temë. Instituti monitorohet 24 orë nga kamerat dihet qartë se kush ka hyrë tek frigoriferi dhe ka nxjerrë mostrat që kanë qenë të vendosura nën mostrat tjera dhe janë zhdukur. Porosia ime për Albulena Haxhiun është që të kryejë punën e saj”, deklaroi deputeti i VV-së.
Ndërkohë, në fund iu desh që të lexonte nga letra e tij për t’i parë mirë emrat dhe ndoshta edhe renditjen e tyre për këtë rast.
“Mendoj që prokuroria duhet ta marrë në pyetje kryeministrin Kurti, Dejona Mihalin, Albulena Haxhiun, Nazlie Balajn dhe Flutura Gogaj Bajramin”, nënvizoi ai.
