Pavarësisht humbjes së fundit në Shkodër, Tirana e këtij sezoni synon të ruajë fronin e kampionit për vitin e dytë radhazi. Bardheblutë fituan kampionatin sezonin e fundit me një ekip që në fund nuk kishte rivalë. Por Tirana e sotme ka pësuar ndryshime të mëdha.
Nga kampionët në fuqi janë larguar thuajse të gjithë, teksa kanë mbetur Bekaj, Najdovski dhe Toshevski. Largimet e titullarëve kanë ndikuar edhe në vlerën e klubit në Transfermarkt.
Vjet, Tirana kampione vlente plot 6.48 milionë euro ndërsa në këtë moment pas largimeve të lojtarëve, si Seferi e Xhixha, vlen 4.7 milionë euro. Plot 1.8 milionë më pak, por në arkat e klubit kanë hyrë të ardhura të majme.
Drejtuesit nuk kanë mbetur duarkryq pasi kanë afruar lojtarë të tjerë cilësorë, si Abazaj, Lushkja, Aleksi, Deliu, Lulaj dhe po konkurojnë sërish për titullin kampion, teksa kryesojnë kampionatin me 3 pikë nga vendi i dytë.
Nëse ia dalin, sigurisht, vlera e lojtarëve do të rritet sërish. Abazaj dhe Lushkja mund ta shërbejnë këtë si trampolinë për të luajtur sërish jashtë. Por së pari, Abazaj shpreson të rikthehet sa më shpejt në fushë, teksa ndeshjet e këtij muaji i ka humbur.
