Protesta e opozitës dhe pjesëmarrja e lartë e qytetarëve në të është pasqyruar edhe në mediat ndërkombëtare.
Në artikujt e tyre nënvizohet se mijëra mbështetës të opozitës u bënë bashkë në tubimin antiqeveritar të së shtunës, duke kërkuar dorëheqjen e kryeministrit Edi Rama, pasi e akuzojnë për korrupsion dhe keqpërdorim të ekonomisë.
Duke cituar pjesë nga fjalimi i kryedemokratit Sali Berisha, mediat ndërkombëtare nxjerrin në pah kërkesat kryesore të opozitës.
“Ka ardhur koha që ky revolucion të nxjerrë paratë e korruptuara dhe t’i kthejë në paga dhe pensione më të larta”, tha Berisha.
Ndërkohë, në artikullin e “The Washington Post” theksi vendoset edhe te fakti se opozita akuzon kryeministrin Rama për korruptimin e Charles McGonigal , një ish-zyrtar i lartë i kundërzbulimit të FBI-së, i cili akuzohet në Shtetet e Bashkuara se ka fshehur nga FBI detajet kryesore të një udhëtimi në Shqipëri në vitin 2017 me një ish-zyrtar të inteligjencës shqiptare, i cili dyshohet se e ka paguar të paktën 225,000 dollarë.
