Policia e Durrësit ka reaguar me një komunikatë për mediat lidhur me incidentin e ndodhur në basenin e lumit “Zezë” në Fushë Krujë, që u transmetua nga emisioni “Fiks Fare” mbrëmjen e djeshme.
Në emisionin e djeshëm u publikuan pamje të rënda sesi gazetarët dhe grupi i xhirimit ishin sulmuar nga persona të armatosur teksa kryenin punën e tyre investigative në terren.
Aty shfaqeshin disa persona që gërryenin basenin e lumit “Zezë” dhe merrnin në kundërshtim me ligjin, inerte nga ky lum.
Ngjarja ka ndodhur shumë pranë fshatit Verjon, teksa ky grup personash në bashkëpunim me të tjerë u konfliktuan me grupin e xhirimit dhe i kërcënuan ata me armë gjahu, madje duke i mbajtur peng për 30 minuta.
Sipas shpjegimit në emission, forcat e rendit të Fushë-Krujës i erdhën në ndihmë grupit të xhirimit vetëm pas rreth 50 minutash dhe në largësi nga vendi ku ndodhi ngjarja.
Sakaq në komunikatën e policisë së Durrësit thuhet se specialistët për Hetimin e Krimeve të Komisariatit të Policisë Krujë, në vijim të veprimeve hetimore, të kryera menjëherë sapo morën njoftim për ngjarjen, shpallën në kërkim tre personat që kanosën dhe kërcënuan gazetarët dhe operatorët.
“E. K. (drejtuesi i ekskavatorit), G. K., 30 vjeç dhe H. V., 30 vjeç, pasi këta shtetas, në bashkëpunim me njëri-tjetrin, kanë kërcënuar grupin e xhirimit, duke qëlluar me armë gjahu, në basenin e lumit Zeze”, sqaron policia.
Gjithashtu në kuadër të veprimeve hetimore janë referuar materialet në Prokurori dhe ka nisur procedimi penal për shtetasit A. L. (drejtuesi i kamionit) dhe E. Gj. (drejtuesi i kamionit), për veprat penale “Shpërdorimi i tokës” dhe “Kanosja për shkak të detyrës”.
Policia ka sekuestruar edhe mjetet e tonazhit të rëndë që përdoreshin për të gërryer basenin e lumit “Zezë’.
Për këtë ngjarje e kanë pësuar edhe dy punonjës të IKMT-së në Durrës, të cilët janë vendosur nën hetim pasi akuzohen për “shpërdorim detyre” duke lejuar një veprimtari të tillë.
“Gjithashtu, në vijim të veprimeve procedurale për këtë rast, u referuan materialet në Prokurori dhe nisën hetimet për shtetasit E. B. dhe F. Sh. (punonjës të IKMT-së, Drejtoria Rajonale Durrës), pasi duke qenë përgjegjës për monitorimin e kësaj zone, dyshohet se kanë konsumuar elemente të veprës penale “Shpërdorimi i detyrës””, thuhet në komunikatën e policisë.
Materialet për këtë rast i kaluan Prokurorisë, për veprime të mëtejshme.
