Katër ditë të kaluara në spital duket se kanë përmirësuar gjendjen shëndetësore të ish-zyrtares së Kryeministrisë dhe këshilltares së Arben Ahmetajt, Alda Klosi, e cila vetëm 12 orë pas arrestimit nuk përballoi dot presionin dhe përfundoi nën kujdesin e mjekëve.
Sipas Neës24, Klosi është transferuar nga spitali i QSUT-së, në paraburgimin e burgut të grave “325”, në zonën e “Ali Demit”.
Mësohet se transferimi i ish-zyrtares, ndaj të cilës Gjykata caktoi para dy ditësh masën ‘arrest me burg’, është kryer rreth orës 15:00 të mesditës dhe ajo do të qëndrojë në të njëjtin institucion ku është burgosur edhe pastruesja Rozeta Dobi, e cila grabiti mbi 500 mijë euro në banesën e saj.
42-vjeçarja është vendosur ne dhomën e observimit të paraburgimit ku do qëndrojë 5 deri në 10 ditë dhe më pas do të kalojë në dhomën normale të paraburgimit.
Alda Klosi akuzohet për veprat penale; “pastrim parash”, “fshehje të pasurisë” dhe “deklarim të rremë para oficerit të Policisë Gjyqësore”.
Vetëm pak orë pasi ka përfunduar në qeli ish-shefja e kabinetit të Arben Ahmetaj shfaqi tension të lartë dhe u dërgua me urgjencë në QSUT për të marrë ndihmën e nevojshme mjekësore.
Arrestimi i Alda Klosit erdhi pas dëshmisë së sanitares, e cila më herët bashkë me të birin Havier Dobi ishte arrestuar me akuzën e vjedhjes së 120 mijë eurove nga shtëpia e zyrtares.
Një kontroll i dytë i banesës së Rozeta Dobit zbuloi dhe 405 mijë euro të tjera të cilat mbetën pa zot për pak kohë, por në rrëfimin e plotë të sanitares para hetuesve, u zbulua se gjithçka ka qenë inskenim dhe paratë e gjetura në banesë nuk ishin vjedhur por ish-zyrtarja e lartë ia kishte dhënë për t’i fshehur.
