Ashtu siç edhe ishte paralajmëruar prej disa kohësh Shqipëria ka hequr vizat me Republikën e Kinës dhe shtetin e Emirateve të Bashkuara Arabe.
Në vendimet e miratuara nga qeveria në mbledhjen e kësaj të mërkure bie në sy firmosja e marrëveshjes ndërmjet Këshillit të Ministrave dhe qeverisë kineze, për heqjen e ndërsjellë të vizave për mbajtësit e pasaportave të zyrtarëve publikë dhe qytetarëve të zakonshëm.
Shtetasit shqiptarët do të mund të udhëtojnë kështu drejt shtetit aziatik pa qenë më nevoja të pajisen me viza dhe me hyrjen në fuqi të marrëveshjes mund të qëndrojnë të pashqetësuar deri në 180 ditë.
Sakaq, këtë mundësi qytetarët kinezë e kanë pasur për të hyrë në Shqipëri me viza turistike që prej vitit 2019.
“Në mbështetje të nenit 100 të Kushtetutës dhe të nenit 19, të ligjit nr.43/2016, “Për marrëveshjet ndërkombëtare në Republikën e Shqipërisë”, me propozimin e ministrit për Evropën dhe Punët e Jashtme, Këshilli i Ministrave vendosi: Miratimin e marrëveshjes, ndërmjet Këshillit të Ministrave të Republikës së Shqipërisë dhe qeverisë së Republikës Popullore të Kinës, për heqjen e ndërsjellë të vizave për mbajtësit e pasaportave të zyrtarëve publikë dhe pasaportave të zakonshme, sipas tekstit që i bashkëlidhet këtij vendimi”, thuhet në njoftimin e qeverisë.
Përsa i përket marrëveshjes me Emiratet e Bashkuara, vizat hyrëse janë përjashtuar për personat që kanë pasaporta diplomatike apo pasaporta speciale dhe të shërbimit.
“Në mbështetje të nenit 100 të Kushtetutës dhe të nenit 10, të ligjit nr.43/2016, “Për marrëveshjet ndërkombëtare në Republikën e Shqipërisë”, me propozimin e ministrit për Evropën dhe Punët e Jashtme, Këshilli i Ministrave vendosi: Miratimin, në parim, të marrëveshjes me shkëmbim notash për ndryshimin e marrëveshjes, ndërmjet Këshillit të Ministrave të Republikës së Shqipërisë dhe qeverisë së Emirateve të Bashkuara Arabe, për përjashtimin e ndërsjellë të vizës hyrëse për mbajtësit e pasaportave diplomatike dhe speciale/të shërbimit, nënshkruar më 13 prill 2015”, thuhet gjithashtu në njoftim.
Vendimi për të dyja këto marrëveshje do të hyjë në fuqi menjëherë pas botimit në “Fletoren zyrtare”.
