Mjeti që shihni në foto është mjeti për të cilin policia doli me një njoftim zyrtar më herët gjatë paradites, duke lajmëruar se do të lëvizë nga porti i Durrësit në drejtim të Elbasanit.
Makineria gjigande ka mbërritur ditë më parë në portin më të madh në vend, ndërsa destinacioni final i saj është kompania “Kurum”, që operon në Metalurgjikun e Elbasanit.
Bëhet fjalë për një transport të vështirë dhe të komplikuar, pasi makineria është jashtë përmasave të zakonshme dhe operacioni në fjalë është kompleks.
Makineria ecën me rreth 5 km në orë dhe mendohet se do të zgjasë rreth 12 orë udhëtim.
Sipas apelit që policia e Durrësit lëshoi për drejtuesit e mjeteve, ata duhet të tregojnë mirëkuptim, pasi transporti do të jetë i ngadaltë dhe mund të shkaktohen pengesa për lëvizjen normale të mjeteve.
“Duke nisur nga ora 22:00, deri në orët e para të mëngjesit, nga porti i Durrësit, në drejtim të qytetit të Elbasanit, do të kryhet transporti i një mjeti jashtë norme, i cili i kalon kufijtë e përmasave gabarrite.
Kërkojmë mirëkuptimin e të gjithë drejtueseve të mjeteve që do të qarkullojnë në këtë aks rrugor, pasi lëvizja do të jetë shumë e ngadaltë dhe do të krijohen pengesa për levizjen normale të mjeteve.
Mjetet e tonazhit të rëndë ta eliminojnë qarkullimin në këtë aks rrugor dhe të qarkullojnë në akse të tjera alternative, për të cilat do të informohen nga shërbimet e Policisë Rrugore që do të jenë të pranishme në këtë aks rrugor”, sqaroi policia në njoftimin e saj.
