Nga Boldnews.al
Për të kuptuar sëkëlldinë e Ramës nuk do shumë mend për ta gjykuar, e aq më pak kalem për ta shkruar. Sot Rama është de jure kryeministër, por de facto një qenie njerëzore depresive që i ka rënë një hall i madh, të cilin e gatoi vetë e tashmë është i detyruar të kapërdijë atë “lugë çorbë të prishur”, e më pas të vjellë tërë jetën.
Skandali i përmasave oqeanike Rama-McGonigal, nuk mund të shuhet me ministre që e hedhin urinën përpjetë në Parlamentin tonë, as nga mizoria e analistëve që sot më shumë se kurrë tentojnë të mbulojnë me idiotësi llomotitëse marrëzinë e Ramës. Ai shkoi deri në atë pikë sa në takimin jo zyrtar me ish-shefin e Kundrazbulimit në FBI, Charls McGonigal, në prani të ish-agjentit të Sigurimit të Shtetit, Agron Neza, tentoi të vrasë opozitën dhe dyshohet se e pagoi McGonigal me anë të “këshilltarëve” informal që me dokumente të dala nga zyra e tij të niste një hetim kundër Lulzim Bashës dhe Partisë Demokratike.
Një perversitet jo vetëm politik por mbi të gjitha antinjerëzor, që për të vrarë shpirtin e çdo shqiptari opozitar arriti deri aty sa me llumin e parave që vijnë nga korrupsioni të korruptohej një nga zyrtarët e lartë të FBI-së. Fakti është brenda dhe është aq i madh sa vetë shukat prej 225 mijë dollarëve të bëra rul që përfunduan nga “këshilltari ish-agjent” i Ramës tek kryeagjenti i FBI me qëllim që të fundosë PD-në.
Rama vetë nuk di se në cilën vrimë të futet tani dhe po tenton të lëshojë çdo mik apo bashkëpunëtor që bashkë me të morën pjesë në këtë maskaradë që mban erë të rëndë, aq sa ka ia ka zënë hundët dhe gojën një personazhi të rëndësishëm me seli në Rrugën e Elbasanit… Në vetëm një dalje publike, Rama la të kuptohej se nuk e dinte se çfarë kishin bërë të tjerët pas takimit me McGonigal, duke shtuar se nuk ka një çështje hetimore për të në SHBA.
Rama është gati që të groposë këdo bashkëpunëtor që ka marrë pjesë në këtë lemeri korruptive dhe biseda me McGonigal i arrestuar në SHBA për lidhje me oligarkët rusë dhe ryshfet me shqiptarët.
I zënë ngushtë Rama mund të bërtasë: “Shokë, spiunin e korruptoi Milo”. Ama harron një fakt shumë të madh që sot ai është i monitoruar nga drejtësia në SHBA dhe politika atje, e cila shumëçka i ka falur Ramës, por vetëm korruptimin e kryeagjentit të tyre fill pasi doli nga zyra e kryeministrit nuk mund ta falë. Për më shumë që “spiuni Milo (Neza)” ka gojë dhe flet vetë për të nxjerrë të vërtetën në këtë lojë të pështirë me regji, skenar dhe madje edhe aktrim të vetë kryeministrit de jure tonit, por de fakto e një qenie frymore që do të detyrohet të vjellë atë “lugë të vogël” korrupsioni që është kthyer në helm politik për të.
