Ish-drejtoresha e Autoritetit Rrugor Shqiptar, Sonila Qato është paraqitur sot në ambientet e GJKKO-së, ku do të zhvillohet një seancë paraprake për dosjen e SPAK ku është hetuar për shpërdorim detyre dhe korrupsion lidhur me tenderin e aksit rrugor Kardhiq-Delvinë.
Qato akuzohet se ka shpërdoruar detyrën, ndërsa dosja është mbyllur pak javë më parë nga Prokuroria e Posaçme që ka çuar për gjykim 10 persona që u morën nën hetim.
SPAK ka gjetur elementë të veprës penale “shpërdorim detyre”, “shkelje të barazisë në tendera”, “falsifikim i dokumenteve” dhe “korrupsion pasiv i personave që ushtrojnë funksione publike”, ndërsa hetimi vijon për lotin e 7-të të rrugës Kardhiq-Delvinë me vlerë gati 60 milionë euro.
Fillimisht ishte Kontrolli i Lartë i Shtetit që zbuloi shkeljet dhe referoi materialet te organi i akuzës, ndërsa për këtë çështje përveç Qatos, po hetohen edhe Elona Gogo, Simon Prendi, Arbër Troka, Ariana Hasani, Erdit Salillari, Almir Hoxhaj, Nikollaq Mihali, Miranda Shkurti dhe Admir Pahumi.
Hetimet për dosjen kanë zgjatur 3 vite nën drejtimin e prokurorit Altin Dumani, i cili është prej dhjetorit edhe kreu i ri i SPAK. Kallëzimi penal për Qaton u bë në SPAK në muajin shtator 2019 nga kompania “Gjoka Konstruksion”, e cila pretendoi se u përjashtua në mënyrë të padrejtë dhe antiligjore nga prokurimi.
Pas kësaj ARRSH zgjodhi për vijimin e punimeve kompaninë e “Vëllezërve Hysa”.
