Taulant Balla përdori çdo gur në seancën e sotme plenare për të mbrojtur Edi Ramën nga akuzat e opozitës për aferën McGonigal.
E nisi me kundër-akuzë, duke thënë se deputetët e PD po përdorin hetimin e një zyrtari të FBI për të sfumuar hetimet për “21 Janarin”, e vijoi duke mohuar atë që është shkruar e zezë mbi të bardhë në dosjen amerikane, përmendjen 14 herë të Edi Ramës në aktakuzën për Charles McGanigal dhe e mbylli jashtë sallës duke sulmuar gazetarët për pyetjet në lidhje me skandalin.
Në fjalën e tij jashtë Parlamentit, kreu i Grupit të PS u mbrojt për takimet me McGonigal, të cilave nuk u ka shpëtuar as vetë, duke thënë se “çdo zyrtar do t’i bënte ato takime” pasi janë kërkuar nga vetë sh-zyrtari i FBI.
Por teksa Rama i fshihet llogaridhënies duke lënë të vetët që të justifikojnë aktet e tij, Balla duket se e ka humbur toruan dhe iu kthye me nerva gazetarëve për interesin e treguar mbi çështjen, duke u thënë se “janë rëndë” e “janë zhytur thellë” pasi sipas tij “rrinë shumë me ta”, duke iu referuar deputetëve të opozitës.
“Po ju them se çdo zyrtar shqiptar, kemi qenë ne apo kushdo të kishte qenë dhe do t’i kërkohej një takim, do ta priste në takim. Nuk shoh asnjë kontradiktë me atë që ka thënë zoti Çuçi. Mund të qëllojë të takojmë një tjetër zyrtar që vjen në Shqipëri, dhe më pas të rezultojnë të hetohet, do mbaj unë përgjegjësi?! Jeni aq rëndë, ngaqë rrini më shumë me ta… Çuçi nuk ka qenë ministër i Brendshëm, ai ka qenë në Shqipëri në 2017, takimet me ne i ka kërkuar ai. Jeni zhytur aq thellë…”, tha Balla.
Ndërkohë më tej ai justifikoi edhe mungesën e kryeministrit në interpelancën e thirrur sot me të nga Gazment Bardhi, duke u shprehur në terma të thjeshtë, se Rama shkon kur të dojë ai në Kuvend.
“Kryeministri është në detyrë nga mëngjesi në darkë, dhe se kur vjen në Parlament e cakton ai”, u shpreh kreu i Grupit të PS.
“E para: ka një praktikë që kryeministri mund të delegojë zhvillimin e një interpelance. Kur isha në opozitë kërkova 18 interpelanca, dhe vetëm dy u bënë me kryeministrin e asaj kohe, ndërsa të tjerat me delegim. ka një bazë ligjore që lidhet me kushtetutën, me ligjin, ku neni 6 i jep kryeministrit të drejtën e delegimit. Kuvendi vepron me rregulloren dhe me precedentin, në fakt kjo ka ndodhur dhe në këtë legjislaturë. Ka pasur kërkesa dhe nga deputetë të opozitës, ku janë zhvilluar nga në përfaqësues i qeverisë. Duhet të kuptoni se deputetët e opozitës, përfaqësues të asaj që quhet PD zyrtare, s’kanë interes për këtë çështje. Ata folën në emër të drejtësisë amerikane
Më lejoni të flas dhe të them përgjigjen time. Kryeministri ka një axhendë. Gjatë zhvillimit të kësaj seance për ligje që kalojmë sot, sikurse ishte ligji që ishte miratuar me konsensus për informacionet e klasifikuara, për deklasifikimin e dosjeve sot votuam që më në fund të hiqnim atë pengesën e fundit për të shkuar te dosjet. Rama është në detyrë. S’ka asnjë shmangie nga një çështjes që nuk është çështje. Që nga dita e parë, këtu bëhet fjalë për një përpjekje për t’i ikur se kush janë temat e debatit”, shtoi më tej ai.