Sot përkujtohet përvjetori i vdekjes së simbolit të Tiranës dhe legjendës së futbollit shqiptar, Arben Minga.
Minga i përket njërit prej brezave të artë të futbollit të Tiranës, atij të viteve 80-të, ndonëse ai e vazhdoi karrierën edhe në vitet 90-të.
Debutimi në futbollin profesionist, erdhi më 20 nëntor 1977, në sfidën 17 Nëntori (sot KF Tirana)-Shkëndija, ndërsa goli i parë më 2 prill 1977, në fitoren e 17 Nëntorit 3-1 ndaj Luftëtarit.
Gjatë karrierës brilante, Minga u bë simboli i sakrificës dhe përkushtimit, për të ndihmuar në futbollin total të asaj Tirane. Për disa vite, mbajti në krah shiritin e kapitenit.
Ai ndihmoi bardheblutë në fitoren e 6 kampionateve (1982, 1985, 1988, 1989, 1995, 1996), 4 Kupave të Shqipërisë dhe 1 Superkupë (1994), ndërsa do të shpallej edhe golashënuesi më i mirë në sezonin 1984-85 (13 gola).
Pikë kulmore e karrierës së Mingës, ishte edhe ndeshja e 18 tetorit të vitit 1989 kur Tirana do të luante në transfertë kundër Bayern Munchen, ndeshje e vlefshme për 1/8 e Kupës. Asokohe bardheblutë shkëlqenin dhe ndaj gjermanëve zbritën në fushë si të barabartë. Ndeshja u nis vrullshëm nga vendasit që kaluan të parët në avantazh duke realizuar dy herë.
Në minutën e 30-të, Tirana me një kundërsulm të bukur arrin të ndëshkojë bavarezët me të madhin Arben Minga. Edhe pse ekipi bardheblu u mundua të barazonte, takimi nuk pati më shumë histori pasi skuadra gjermane arriti të fitonte me rezultatin 3-1. Pikërisht golin e shënuar nga Arben Minga.
Ai numëron tre pjesëmarrje në Kupat e Kampionëve dhe një herë në Kupën e Kupave. Me bardheblutë Minga zhvilloi 332 ndeshje duke realizuar plot 133 gola.
Minga dha kontribut edhe te kombëtarja, fillimisht me ekipin “Shpresa”, ku i dha vendit dy trofe ballkanike, në vitet 1978 dhe 1981.
Nga U-21 te kombëtarja e madhe, aty ku shtatlartësia do të bënte shpesh diferencë, nisur edhe nga fakti se brezi i artë i viteve ’80 te Tirana përbënin edhe ekipin përfaqësues më së shumti.
Goli i famshëm ndaj Belgjikës, më 1984, në fitoren 2-0 në “Qemal Stafa”, konsiderohet si një nga golat më të rëndësishëm në historinë e futbollit shqiptar.
https://www.youtube.com/watch?v=KbdFZlW-mVs
Me hapjen e kufijve në vitin 1990, Minga provoi karrierën jashtë vendit, ndonëse ishte në një moshë jo të re, tashmë 32 vjeç. Ai luajti në Rumani për disa kohë, ndërsa më pas u kthye sërish te skuadra e tij e zemrës, Tirana, duke dalë kampion më 1995 dhe 1996 dhe duke fituar Kupën e Shqipërisë më 1996.
Me 6 tituj kampion dhe 4 kupa ai është një nga futbollistët me më shumë suksese në historinë e futbollit shqiptar.
Ish-sulmuesi i fuqishëm ka qenë edhe anëtar i kryesisë së klubit si dhe kandidat për t’u bërë sekretar i klubit Tirana, kur më 1999 garoi së bashku me Sulejman Memën dhe Agustin Kolën. Mema fitoi, duke zënë vendin e lënë bosh nga Millan Baci.
Për karrierën e lavdishme, Minga është nderuar me titujt “Mjeshtër i Merituar i Sportit”, “Nderi i Sportit Shqiptar” si dhe “Nderi i Tiranës”.
Arben Minga u nda nga jeta në moshën 47-vjeçare në 31 janar të vitit 2007 në Kanada. Legjenda u shua pasi luftoi për një kohë të gjatë nga kanceri në pankreas, por emri i tij do të kujtohet dhe këndohet gjithmonë nga tifozët e Tiranës.
