Mbetet ende mister fati i 26-vjeçarit, Mateo Lika, i cili dyshohet se ra nga ura e Mbrostarit në Fier teksa po kthehej nga Gjermania me makinë, ngjarje e ndodhur më 15 janar të këtij viti.
Ndërkohë ditën e sotme kanë rifilluar sërish kërkimet për gjetjen e 26-vjeçarit dhe automjetit të tij, tip “Ford”, i cili dyshohet se ra në ujërat e lumit Seman.
Ndonëse prej disa ditësh vijojnë kërkimet, deri më tani nuk është gjetur asnjë shenjë nga i riu.
Si ndodhi ngjarja?
Mateo Lika, 26 vjeç, dyshohet se teksa po kthehej nga Gjermania, me një makinë me qera, është përplasur me parmakët e Urës së Mbrostarit dhe më pas ka rënë në lumin e Semanit.
Duke qenë se nuk ka patur asnjë denoncim për persona të tjerë të zhdukur, mendohet se 26 vjeçari ka qenë i vetëm në makinë. Që prej ditës së aksidentit, Mateo Lika nuk përgjigjet në telefon edhe pse familjarët e tij kanë tentuar ta kontaktojnë.
