Elsion Koka është një nga të rinjtë shqiptar që ka braktisur në mes rrugëtimin e tij në botën e sportit për të punuar si një “kopshtar” në fermë kanabisi në Britaninë e Madhe.
26-vjeçari nga Librazhdi, i cili nga viti 2013 deri në 2020 ka luajtur si futbollist profesionist për ekipe si Shkëndija e Tiranës, Luzi2008 dhe KF Klosi, është vënë në pranga brenda një banese të konvertuar në “shtëpi bari” në Stanley Terrace, të zonës Mount Pleasant në qytetin e Swansea.
Kur policia ndërhyri në shtëpinë e përshtatur në një plantacion kanabisi ata zbuluan 289 bimë me nivele të ndryshme pjekurie, të ndara në dhoma të ndryshme.
Një ekspert i nartkoikëve vlerësoi se rendimenti i mundshëm i bimëve mund të ishte deri në 24 kg me një vlerë në rrugë deri në 125,000 £.
Gjatë ndërhyrjes në shtëpi ndodhej i pandehuri Koka, i cili pasi u arrestua, u intervistua por nuk pranoi të flasë para hetuesve.
Prokurori i çështjes tha në seancën gjyqësore në Gjykatën e Swansea se për Kokën ishte paguar nga një bandë kriminale një shumë “e konsiderueshme” parash për ta çuar ilegalisht në Mbretërinë e Bashkuar.
Një pjesë të udhëtimit i riu e ka kryer në bagazhin e një automjeti dhe kishte pritur që të gjente punë në ndërtim, por më pas përfundoi në fermën e kanabisit.
26-vjeçari nuk ka asnjë dënim të mëparshëmm ndërsa avokati i tij Hywel Davies e mbrojti duke thënë se i pandehuri ka shkuar në Mbretërinë e Bashkuar për të fituar para për t’i dërguar në shtëpi familjes së tij.
Gjatë mbrojtjes së Kokës, avokati i tij tregoi se i riu kishte qenë një futbollist profesionist për një periudhë kohe dhe ishte një njeri me arsim të lartë me një diplomë Master në shkencat sportive.
Sipas mediave britanike ai tha se duke pasur parasysh statusin e emigracionit të Kokës, një dënim ishte i pashmangshëm.
Ndërkohë në faqen zyrtare të Federatës Shqiptare të Futbollit rezulton i regjistruar edhe një profil i Kokës si futbollist profesionist, që tregon të gjithë ecurinë e tij në kategoritë e ulëta të futbollit në vend.
Burimi: Walesonline
