Kriza energjetike në Britaninë e Madhe do të bëjë sot që pronarët e shtëpive të nisin të aplikojnë planin dimëror të emergjencës, i cili ishte hartuar nga National Grid, duke fikur pajisjet elektroshtëpiake si furrat dhe lavatriçet, por edhe radiatorët e ngrohjes midis orës 5 dhe 6 të pasdites.
Por pavarësisht se plani parashikon kursimin e energjisë në një fashë orare të caktuar për të parandaluar ndërprerjet në një nga ditët më të ftohta të vitit, miliona familje dhe biznese do të paguhen për të shkurtuar përdorimin e tyre të energjisë elektrike nga National Grid.
Rrjeti Kombëtar ka sqaruar se do të aktivizojë Shërbimin e Fleksibilitetit të Kërkesës (DFS) këtë mbrëmje me 26 furnizues kryesorë të energjisë si British Gas, EDF, Eon dhe Octopus Energy që kanë nënshkruar marrëveshjen.
Por në një njoftim nënvizohet se të gjithë abonentët që i binden thirrjes mund të marrin pagesën e energjisë elektrike prej 20 £. Ata do të duhet të mos përdorin furra, lavatriçe, tharëse, pjatalarëse, video-games ose të mos i karikojnë makinat e tyre gjatë orarit të pikut.
Skema mbështetet te përdoruesit që kanë një matës inteligjent të energjisë, pra një pajisje që transmeton automatikisht përdorimin e energjisë tek ofruesi çdo 30 minuta.
Kjo është hera e parë që Rrjeti Kombëtar i Energjisë në Britani zbaton skemën DFS që kur u njoftua nëntorin e kaluar, pasi ishulli përgatitet për temperatura të acarta gjatë kësaj jave.
