Ambasadorja amerikane Yuri Kim duket se nuk e ka hedhur lehtë pas krahëve postimin në Twitter të Ministrisë së Jashtme të Shqipërisë, ku i kujtonte largimin nga selia diplomatike më 22 janar e që erdhi vetëm pak ditë para zgjedhjes së kreut të ri të SPAK.
Teksa foli për rrugëtimin e saj tre vjeçar në Shqipëri në një intervistë televizive, Kim u shpreh se e ka pranuar postimin e MEPJ si shpjegim të qeverisë, por refuzoi të thotë se e beson qëllimin, për të cilin Xhaçka tha se ishte për ta shpëtuar ambasadoren nga “akuzat dhe thashethemet” e opozitës.
Ndër të tjera Kim u pyet për raportin me kryeministrin Rama dhe zërat për një përplasje mes tyre për prokurorin që do të merrte drejtimin e SPAK, për të cilën u shpreh me diplomaci duke e kanalizuar pergjigjen e saj tek raporti midis dy qeverive dhe jo marrëdhënia e saj ulje-ngritje me Ramën.
“Marrëdhënia midis dy qeverive është shumë e fortë dhe pjesa e asaj marrëdhënie është edhe ajo mes kreut të qeverisë dhe ambasadores amerikane. Dhe dua të them, se këto nuk janë marrëdhënie personale por zyrtare. Ajo që dua të them është se kur unë dhe kryeministri synojmë diçka ne e bëjmë atë punë. Mbështetja për afganët ishte diçka e mrekullueshme. Është e vlerësueshme që kryeministri e mori atë vendim si mbështetje e plotë nga populli shqiptar. Ky vend nuk merr merita sa duhet për ndihmën që jep”, tha ajo.
Pati një reagim nga MEPJ që fliste për ju dhe kohën e largimit nga Shqipëria. Dhe të gjithë komentuesit dhe analistët bien dakord se ky ishte një gabim. Si ju duk juve ky reagim i MEPJ, se madje pati fjalë që jeni takuar në ministri me Xhaçkën.
Ministrja e jashtme ka qenë në atë post për ca kohë. E njohim mirë që nga koha e saj si Ministre e Mbrojtjes dhe kur qeveria e Shqipërisë nxjerr një shpjegim ne pranojmë fjalën e tyre.
Pra i besoni?
Pranojmë fjalën e tyre!
Kur do të largoheni? Do keni kohë ta shihni dhe 30% tjetër të Shqipërisë?
Do doja ta dija. Normalisht nëse sheh mandatin zakonisht jemi këtu përreth 3 vjet, por në fund varet nga Presidenti dhe Senati ynë, ndaj nuk e parashikoj dot. Dua të them se jam këtu për të bërë një detyrë në emër të vendit tim dhe do ta bëj deri në ditën e fundit.
