Sir Jim Ratcliffe, miliarderi i cili vlerësohet si ‘anglezi më i pasur” nga revista “Forbes”, ka hyrë zyrtarisht në garë për të blerë klubin e Mançester Junajtid nëpërmjet kompanisë së tij “Ineos”.
Familja Glazer bëri të ditur se ishte gati të shiste pas 17 vitesh pronësi “djajtë e kuq”, pasi e kanë kthyer në një superfuqi financiare. Mediat angleze kanë spekuluar prej kohësh se ata kërkojnë 5 miliard paund për të shitur aksionet e tyre në klub dhe sipas “The Times”, ”Ineos” ka regjistruar zyrtarisht interesin për të blerë klubin.
“Ne jemi përfshirë zyrtarisht në proces”, konfirmoi një zëdhënës i ”Ineos”. Pritet që ofertat zyrtare të nisin në fillimin e muajit shkurt, ndërsa Ratcliffe do të ketë konkurrencë të fortë nga kompani të tjera në SHBA, Lindjen e Mesme apo Azi. Përfaqësues të shtetit të Arabisë Sauditë, kanë shprehur hapur dëshirën për të blerë klube si Mançester Junajtid apo Liverpuli.
Ratcliffe u mundua të blinte Chelsean pak muaj më parë, por u mund nga fondi amerikan i drejtuar nga Tod Bohli, i cili pagoi 2,5 miliard paund, teksa garantoi se do të investonte të paktën edhe 1,75 miliard paund të tjera te londinezët. Ndërkohë, kompania “Ineos” zotëron paralelisht edhe klubin e njohur francez, Nisë.
