Bandat shqiptare që kontrollojnë zona të caktuara përsa i përket tregtisë së drogës në Britaninë e Madhe janë rikthyer sërish në vëmendjen e mediave në ishull.
“The Sun” ka publikuar sot një artikull ku në qendër janë bandat që operojnë në Britani, ku mes më të fuqishmeve renditet edhe “Hellbanianz”.
Aty theksohet që bandat, të cilat kontrollojnë “county lines”, pra linjat e shitjes së kokainës janë shtrirë në të gjithë vendin.
“Ata jetojnë në pallate, rezidenca apo kështjella. Por pas dyerve të përforcuara të këtyre qendrave të krimit shtrihet një botë dhomash paniku, dyqane armësh dhe luksi të jashtëzakonshëm”, thuhet në artikull.
Sakaq, sipas “The Sun” anëtarët e bandës shqiptare “Hellbanianz” jetojnë në disa kulla në pronën “Gascoigne”, në zonën lindore të Londrës, lagjia Barking.
“Në blloqet e kullave në pronën Gascoigne në Barking, gangsterët e armatosur shqiptarë janë në prag të marrjes nën kontroll të tregtisë së kokainës prej 5 miliardë paundsh në Mbretërinë e Bashkuar”, shkruan e përditshmja britanike.
“Duke u mburrur me flotat e Rolls Royces dhe Betleys, Hellbanianz janë tregtarë ambulantë dhe zbatues të Mafias Shqiptare. Me miliona fitime, mafiozët ballkanikë kryejnë gjithashtu grabitje të armatosura në të gjithë kryeqytetin dhe mendohet se takohen pranë pijetores Kings Lounge”, shkruan ndër të tjera “The Sun”.
