Anëtari i Këshillit Kombëtar të Partisë Demokratike Aleksandër Biberaj, ka deklaruar se Enkelejd Alibeaj i shërben kryeministrit Edi Rama. Në një intervistë për emisionin “Frontline” në News24, Biberaj u shpreh se nuk është tagër i tij që të bëjë përjashtime.
Përgjegjësinë për bashkimin e demokratëve, Biberaj e shikon tek Sali Berisha, për të cilin thotë se ka eksperiencën e duhur.
“Situata nuk është e mirë dhe kjo nuk është normale. Kjo është hera e pare që kryetari i grupit shkarkon deputetë nga grupi sepse nuk është tagër e tij. Ai është deputet si gjithë të tjerët. Në 32 vite është hera e parë që ndodh. Alibeaj nuk ka mandat për ta bërë një gjë të tillë, plus nuk kemi luksin ta bëmë një lëvizje të tillë. Nuk kemi luksin të përjashtomë asnjë qytetar për t’u marrë votën e jo më deputetë kur jemi në opozitë dhe jemi pak në Parlament.
Nuk kemi luksin për të dalë me dy kandidatë, do ishte në shërbim të kësaj mazhorancë të degraduar në korrupsion. Ato vijojnë të vjedhin dhe të poshtërojnë këtë popull 24 orë. Përgjegjësia më e madhe është e Berishës, të bashkojë PD ka eksperiencën, le të gjejë mënyrën.
Duhet të dalim me një kandidat që të rrisim shanset për fitore. Ka 4 vite që qeverisin të vetëm për shkak të gabimeve të Bashës. Është një moment për të kthyer pluralizmin në nivel lokal.
Alibeaj është produkt i Berishës, e mori nga rruga edhe i dha poste. Alibeaj nuk ka asnjë betejë elektorale të fituar, është më pak i votuari brenda PD”, tha anëtari i Këshillit Kombëtar të Partisë Demokratike Aleksandër Biberaj.
Më tej ai u shpreh se përmbysja e regjimit të Ramës nuk mund të arrihet me lule e qirinj, por me protesta me mosbindje civile, ashtu siç veprohet në Europë apo SHBA.
“Moment reflektimi e për ti kërkuar falje demokratëve që i lamë në dorë të një bande të tillë. Rama mund të dojë të rrijë edhe 20 vjet nëse e lëmë. Rama nuk përmbyset me lule e qirinj, me mosbindje civile siç bëjnë evropianet dhe amerikanët. Blloko gjithçka për 5 ditë dhe Rama ikën vetë. Nuk përmbyset regjimi në çadra”, tha ai.
