Rajoni verior dhe ai juglindor i vendit janë përfshirë në orët e para të mëngjesit nga reshjet e dëborës dhe temperaturat e ulëta, ç’ka ka shtyrë Autoritetin Rrugor Shqiptar që të dalë me një mesazh për të kërkuar vigjilencë të shtuar nga drejtuesit e mjeteve.
Sipas ARRSH aktualisht nuk ka asnjë problem për qarkullimin e mjeteve në akset rrugore të Dardhës, apo Lezhë-Vau Dejës, Bogë-Theth dhe Hani i Hotit-Vermosh.
Megjithatë ARRSH kërkon nga shoferët që të pajisen me goma dimërore dhe të qarkullojnë me shpejtësi të ulët, në mënyrë që të mos kenë probleme me drejtimin e mjetit në një mot të tillë.
“Gjatë natës dhe në orët e para të mëngjesit në zonat malore kanë filluar reshjet e dëborës si në Dardhë, Lezhë-Vaudejes, Bogë-Theth, Hani i Hotit-Vermosh, pa sjellë probleme për qarkullimin. Kontraktorët me mjete e punëtorë janë në terren për të bërë pastrimin e akseve, shpërndarjen e kripës dhe për të mbajtur qarkullimin në normalitet. Tregoni kujdes të shtuar gjatë drejtimit të mjetit në kohë me reshje, pajisuni me goma dimërore dhe zinxhirë kur udhëtoni për në zonat malore, ulni shpejtësinë, respektoni sinjalistikën dhe udhëzimet e Policisë Rrugore”, thuhet në njoftimin e ARRSH.
