Ministrja e Energjetikës dhe Infrastrukturës, Belinda Balluku zhvilloi sot një konferencë për mediat ku raportoi për arritjet në 2022 dhe sfidat që priten në 2023, në të gjitha nivelet e këtij dikasteri.
Konferenca, ku fjalën e morën edhe disa nga drejtorët më të rëndësishëm nën udhëheqjen e Ballukut erdhi pas një mbledhje që ministrja kishte zhvilluar më herët me të gjithë vartësit e saj në rang drejtorish.
Në këtë mbledhje është realizuar një analizë e detajuar për çdo sektor në varësi të Ballukut, por ajo çka është vënë re më tepër ishte mungesa në tryezën e diskutimeve të kreut të Operatorit të Shpërndarjes së Energjisë, Ardian Çela.
Mungesa e Çelës në këtë mbledhje të rëndësishme, e cila përkon edhe me nisjen e një viti elektoral, vjen pas përhapjes së zërave se drejtuesi i OSHEE-së prej 10 vitesh do të shkarkohet nga detyra.
Lajmi që qarkullon prej pak kohësh dhe fiton kredenciale me mungesën e sotme të Çelës shtyu gazetarët që të ngacmonin ministren Balluku në lidhje me të.
Ajo u përgjigj me diplomaci duke refuzuar të pohojë zërat për shkarkimin e mundshëm të kreut të OSHEE.
Gjithsesi Balluku kishte rezervuar një mesazh të koduar për Çelën, emri i të cilit është përfolur edhe si kandidati i mundshëm i Partisë Socialiste në zgjedhjet e 14 majit për bashkinë e Durrësit.
“S’kemi asnjë plan për zëvendësimin, apo për gjëra të tjera, por askush nuk është i pazëvendësueshëm”, ishte mesazhi thumbues i Ballukut që ndez kështu thashethemet për një përplasje midis të dyve, e cila ka nisur që prej kohës kur ministrja vendosi në krye të OSSH-së, të besuarin e saj Blendian Dalipi.
Zgjedhja e Dalipit në krye të OSSH dhe fakti që kjo njësi u bë kompania më e madhe e grupit të shpërndarjes me një buxhet prej 240 milionë eurosh, u pa si një lëvizje taktike dhe e guximshme e Ballukut për të kontrolluar sistemin e shpërndarjes së energjisë, ku deri në atë kohë “kompetencat e shefit” i kishte patur pikërisht Ardian Çela.
Çela kishte një linjë autoriteti, që shpesh anashkalonte dhe ministrat e energjisë duke u takuar direkt vetëm me atë të kryeministrit, por me ndryshimin e statutit të OSHEE Group, njeriu që mori në dorë “frerët” e sistemit publik të energjisë është vetë Balluku duke arritur kontrollin e plotë, ndryshe nga të gjithë paraardhësit e saj.
