Ky është 23-vjeçari Havier Dobi, i cili në bashkëpunim me nënën e tij Rozeta Dobi akuzohen se kanë grabitur në një banesë në Tiranë shuma të konsiderueshme parash dhe sende me vlerë, të cilat arrijnë në vlerë totale, rreth 120 mijë euro.
Sipas policisë, grabitja ka ndodhur në banesën ku Rozeta Dobi punonte si pastruese në Rrugën e Kosovarëve.
Hetimet
Policia njofton zyrtarisht se hetimet janë zhvilluar me metoda speciale proaktive dhe për një periudhë tre javore janë arritur të sigurohen provat që fajësojnë personat e arrestuar.
“Nga provat e siguruara në kuadër të këtij operacioni, rezultoi se gjatë periudhës që Rozeta Dobi ka qenë e punësuar për mirëmbajtjen e një banese në rrugën e Kosovarëve, ajo, në bashkëpunim me djalin e saj, ka vjedhur në këtë banesë, shuma të konsiderueshme parash dhe sende me vlerë, të cilat arrijnë në vlerë totale, rreth 120 mijë euro”, njofton policia.
“Gjatë kontrollit të banesës së shtetasve të arrestuar, shërbimet e Policisë gjetën dhe sekuestruan në cilësinë e provës materiale, 58 150 euro, 7000 dollarë, 368 000 lekë të rinj, sende me vlerë (aksesorë floriri), 3 automjete, 2 prej tyre të blera nga paratë e vjedhura, si dhe veshje të përdorura gjatë kryerjes së kësaj veprimtarie”, thuhet më tej në njoftim.
