Ervis Martinaj mbetet ende personazhi më i kërkuar i botës së krimit në Shqipëri dhe me interes po ndiqet zhdukja misterioze e “mbretit” të lojërave të fatit, ndikuar kjo edhe nga “çmontimi” që RENEA dhe FNSH i bën bazës së familjes së tij në Fushë-Kuqe të Kurbinit.
Lidhur me kontrollin e kryer në fundin e dhjetorit, gazetarja Klodiana Lala ka treguar se ka qenë një telefonatë e përgjuar në burg që ka shtyrë policinë të ndërhyjë.
Ajo gjithashtu zbuloi në “Opinion” se pak ditë më parë, xhaxhai i të zhdukurit, Faik Martinaj ka shkuar në Prokurorinë e Kurbinit për të marrë më shumë informacion se si kanë ecur hetimet në lidhje me dosjen.
“Një person brenda burgjeve ka vënë në alarm Policinë. Ervis Martinaj është i shpallur në kërkim. Unë mendoj se të dy opsionet qëndrojnë. Jam e ndarë në mes. Por di që ky aksion është i vonuar. Nga informacionet që unë kam nga Prokuroria e Kurbinit, Faik Martinaj ka shkuar për të kërkuar informacion për hetimet, por nuk ka asgjë të re. Jeton Lami nuk ka dhënë asnjë të dhënë në rrugë zyrtare. Përveç bisedës që ka pasur me Gledis Nano. Konfirmohet edhe nga kamerat e sigurisë. Ai është çelësi i vetëm për të shkuar tek Ervis Martinaj. Ka pasur disa të shoqëruar që kanë lidhje me Martinaj, disa janë lënë të lirë për strategji hetimi, një tjetër është lënë në “arrest shtëpie”. Kjo është një histori që do të vazhdojë shumë gjatë. Autoritetet janë shumë larg zbulimit të të vërtetës”, tha Lala.
