Parcelat e drogës në Dimal/ Apeli ndryshon masat e sigurisë për të arrestuarit, lihen në burg tre persona, gjashtë të tjerë në arrest shtëpie
Gjykata e Apelit në Vlorë ka vendosur sot të ndryshojë masën e sigurisë së dhënë nga Gjykata e Shkallës së Parë Berat për gjashtë nga 11 të arrestuarit për serat e kanabisit në fshatin Drenovicë të bashkisë Dimal në 11 nëntor.
Të arrestuarit kanë dalë pasditen e sotme përpara togave të zeza ndërsa masa e sigurisë “arrest me burg” u apelua nga avokatët e tyre.
11 personat që akuzohen si organizatorët dhe mbikëqyrësit e serës së mbjellë me hashash kanë mbërritur në Gjykatën e Apelit Vlorë nën masa të rrepta sigurie dhe seanca ka zgjatur rreth 3 orë.
Apeli ka caktuar masën e sigurisë “arrest me burg” pa afat për 3 shtetasit: Endrit Xheka, Blerim Xheka dhe Hamdi Dyli (pronari i serave me qera), të akuzuar për veprat penale “prodhim dhe shitje të lëndëve narkotike” dhe “armëmbajtje pa leje”.
Ndërkohë, më bujar është treguar Gjykata me 6 shtetasit: Jurgen Ujkaj, Bashkim Mema, Sidrit Bisha, Edison Mema, Mirvaldo Disha dhe Samuel Lushaj për të cilët është ndryshuar masa e sigurisë në “arrest në shtëpi”.
Sakaq, “detyrim paraqitje” është caktuar për nënë e bijë Drita dhe Izmira Mema, të cilat kontrollonin mbi 100 gra në procesin e punës në serën e kanabisit.
Vendimi për ndryshimin e masave të sigurisë ka mbërritur pranë IEVP-së Berat, ku po kryhen edhe procedurat e nevojshme për largimin e të arrestuarve nga ambientet e këtij burgu.
Parcelat e hashashit në fshatin Rërëz u zbuluan gjatë një aksioni “blic” të Drejtorisë së Përgjithshme të Policisë dhe FNSH-së dhe gjatë tij u sekuestruan rreth 800 kilogramë kanabis.
ishte mbjellë në një sipërfaqe prej 2 hektarësh dhe serat ku ndodhej kanabisi kanë qenë ngjitur me serat e domateve dhe perimeve të tjera të mbjella brenda tyre.
Paketimi,sistemimi i drogës dhe përpunimi i saj kryhej brenda serës nga gratë e punësuara nga organizatorët dhe kokat e këtij aktiviteti kriminal.
