Erisa Fero është arrestuar nga policia kriminale e Korçës si pjesë e një grupi që kryente trafik droge.
Aksioni është kryer nga prokuroria e Pogradecit në bashkëpunim me Drejtorinë e policisë Korçë, duke sjellë arrestimin e zyrtares së AKSHI-t dhe bllokimin e 40 kg drogë hashash. Fero është punonjëse pranë sektorit përkatës të e-Albania, në nivelin Specialiste, sipas një njoftimi të vetë AKSHI-t.
Lënda narkotike vinte nga zona e Shkodrës, ku të implikuar kanë qenë persona nga Fushë-Kruja dhe Korça. Ndërhyrja policore është realizuar në zonën e Qafë-Thanës, pikërisht tek kthesa e restorant Kukësit.
Në momentin e ndërhyrjes është arrestuar Erisa Fero, e cila drejtonte makinën ku u gjend dhe sasia e drogës prej 58 kg hashash. Në makinë së bashku me punonjësen e AKSH, ishte dhe Likmend Basha, djali i një biznesmeni nga Fushë-Kruja.
Ndërsa dy persona të tjerë janë shpallur në kërkim, pasi janë larguar me shpejtësi në momentin e ndërhyrjes së punonjësve të policisë. Aksioni aktualisht vijon për lokalizimin dhe arrestimin e dy personave të tjerë dhe lidhjeve të tyre. Qëllimi ishte që droga të shkëmbehej në zonën e Qafë Thanës, ku mendohej si territor jashtë vëmendjes së policisë.
“Vihen në pranga 3 shtetas dhe shpallen në kërkim 2 të tjerë. Sekuestrohen 58 kg lëndë e dyshuar narkotike kanabis. Si rezultat i saj, u bë arrestimi në flagrancë për veprën penale “Trafikimi i narkotikëve”, kryer në bashkëpunim, i shtetasve: – E. F., 28 vjeçe, banuese në Tiranë; M. K., 17 vjeç, banues në Krujë; L. B., 32 vjeç, banues në fshatin Mafsheq, Krujë. Si edhe u shpallën në kërkim shtetasit F. S., 30 vjeç dhe G. S., 28 vjeç, banues në fshatin Piskupat, Pogradec.
Shërbimet e Policisë në bazë të inteligjencës informative se në drejtim të Maqedonisë, nëpërmjet zonës së fshatit Lin, Pogradec, do të trafikohej një sasi e konsiderueshme lënde narkotike, kanë organizuar punën dhe në Qafë Thanë kanë konstatuar automjetin tip “Volksëagen” pranë të cilit ndodhej shtetasi L. B. Gjatë kontrollit në brendësi të automjetit, në pjesën e bagazhit u gjetën dhe sekuestruan në cilësinë e provës materiale 58 kg lëndë e dyshuar narkotike kanabis. Nga hetimet e kryera rezulton se shtetasja E. F; dhe shtetasit M. K. e L. B., kishin kryer transportimin e lëndës narkotike nga qyteti i Tiranës në drejtim të Qafë Thanës. Po nga veprimet e para hetimore rezulton se trafikimin e sasisë së drogës në drejtim të Maqedonisë, do ta kryenin dy shtetasit e shpallur në kërkim F. S. dhe G.S. Materialet i kaluan Prokurorisë së Rrethit Gjyqësor Pogradec, për veprime të mëtejshme”, thuhet në njoftimin e policisë.
Pas arrestimit, AKSHI njoftoi se ka nisur menjëherë procedurën për shkarkimin nga puna të Erisa Feros.
Lexo edhe:
Dikur numëruese e PS në KZAZ, kush është ekspertja e AKSHI-t që sot u kap me drogë
