Kërcënimi me bombë në Aeroportin e Prishtinës erdhi nga Serbia ‘i maskuar’ me gjuhë arabe. Ka qenë ky konkluzioni i autoriteteve të sigurisë së Kosovës.
Një burim nga institucionet e sigurisë i tha KosovaPress se e-maili që ka ardhur dje në Aeroportin Ndërkombëtar të Prishtinës “Adem Jashari” se ka një bombë, ishte në gjuhen arabe.
Megjithëse, e-maili është shkruar në gjuhën arabe, hetimet kibernetike kanë treguar se bëhet fjalë për një e-mail të fshehur mirë, por që ka ardhur nga Serbia.
Institucionet e sigurisë së Republikës së Kosovës në vazhdimësi kanë dyshuar se format e kërcënimit përmes radikalizmit fetar në Kosovë mund të vijnë nga Serbia. Rasti i një dite më parë ishte ndër rastet e rralla që është argumentuar se dyshimet tona janë me vend, tha i njëjti burim.
Alarmi i djeshëm ishte një tentative për të rritur ndjenjën e pasigurisë dhe të sabotojë infrastrukturën në Republikën e Kosovës.
